Нам улууһун урбаанньыттара министиэристибэҕэ «төгүрүк остуол» тэрийдилэр

Бу күннэргэ Нам улууһун күннэрин чэрчитинэн  улуус  баһылыга Юрий Слепцов салайар исписэлиистэрин бөлөҕө норуот хаһаайыстыбатын салааларынан министиэристибэлэргэ уонна биэдэмистибэлэргэ сылдьаллар.  

Ол курдук, СӨ урбааҥҥа, эргиэҥҥэ уонна  туризмҥа миниистирин бастакы солбуйааччы Максим  Карбушевы кытта намнар “төгүрүк остуолу” тэрийдилэр.  Мунньахха нэһилиэктэр баһылыктара, Нам улууһунааҕы “Биисинэс-киин” дириэктэрэ Борис Бугаев, “Мин биисинэһим” киин дириэктэрэ Марфа Тарабукина, урбаанньыттар, Дьокуускайга үлэлиир урбаанньыттар кыттыыны ыллылар.

Баһылык Юрий Слепцов урбаан министиэристибэтигэр, өрөспүүбүлүкэ урбаанньыттарыгар чөлүгэр түһэрии үлэлэригэр сүҥкэн көмөлөрүн иһин махтанна.

Максим Карбушев туризм хайысхата дьыл кылгас кэминэн буолбакка, сылы быһа үлэлиирэ наадатын, өҥө оҥоруута хаачыстыба ирдэнэрин, гиидтэри, экскурсоводтары бэлэмнээһин, куттала суох эйгэ тэриллиэхтээҕин, улуус бырагыраамалары үбүлээһиҥҥэ кыттыахтааҕын    бэлиэтээтэ. Баһылык Юрий Слепцов Намнааҕы биисинэс-инкубатор аны биисинэс-киининэн буолбутун кэпсээтэ. Халаан уутугар эмсэҕэлээбит урбаанньыттарга көмө оҥорорго туруоруста. Биирдиилээн урбаанньыттар халаан уутуттан эмсэҕэлээбиттэргэ көмө хаһан кэлэрин, судаарыстыбаннай көмөнөн туһаныыны, Уһук Илин гектарынан өрүс кытыытыгар хапытаалынай тутууну ыытыы, ойуур пуондатыттан бэриллибит сири бэйэ бас билиитигэр көһөрүүнү  көҥүллээһин курдук  ыйытыылары биэрдилэр. Маны таһынан, үлэлэрин-хамнастарын билиһиннэрдилэр, кирэдьиити биэриигэ,  агро-туризмы сайыннарыыга  кэккэ этиилэри киллэрдилэр. Модут нэһилиэгин баһылыга Ефим Гоголев Уһун Күөлгэ туристическай комплексы оҥорууга өйөбүлү туруоруста.

Ити курдук, өрүттэр бэрт туһалаах кэпсэтииттэн бэрт үгүһү билэн, санаалара  кынаттанан мунньаҕы түмүктээтилэр.