Нам ыччаттара улуустарын кэскилин Баҕа санаа капсулатыгар түстээтилэр

Нам ыччаттара улуустарын кэскилин Баҕа санаа капсулатыгар түстээтилэр

23.04.2023, 11:30
Хаартыска -- Нам улууһун дьаһалтатын пресс-сулууспата
Бөлөххө киир:

Дьокуускайдааҕы педагогическай кэллиэс аактабай саалатыгар киин куоракка Нам улууһун күннэрин чэрчитинэн улуус баһылыга Юрий Слепцов устудьуон ыччаты кытта көрүстэ.

Көрсүһүүгэ улуус баһылыгын солбуйааччы Мария Игнатьева, улуустааҕы дьиэ кэргэн уонна ыччат бэлиитикэтин управлениетын салайааччыта Екатерина Евстафьева, улуустааҕы үөрэх управлениетын салайааччытын солбуйааччы Светлана Поротова, И.С. Жараев аатынан аудиовизуальнай нэһилиэстибэ национальнай киинин дириэктэрэ Степан Москвитин, 1-кы Хомустаах нэһилиэгин баһылыга Василий Жирков кыттыыны ыллылар.

Тэрээһини өрөспүүбүлүкэтээҕи добровольческай ресурснай киин  дириэктэрэ, Нам ыччата Айыллаан Винокуров бэрт сэргэхтик иилээн-саҕалаан ыытта. Ыччаты кытта үлэлиир уопуттаах буолан, көрсүһүүнү мунньах курдук буолбакка, аһаҕас кэпсэтиини, санаа атастаһыыны тэрийэр инниттэн  дьыалабыай оонньуу пуорматынан ыытта. Ол курдук, ыччаты 4 хамаандаҕа арааран, бэйэлэрин санааларын сайа этэллэрин ситиһэр соруктан тута сорудах бэриллибитэ. Устудьуоннар кылгас бириэмэ иһигэр Нам улууһа кэлэр 5 сылга сайдыытыгар бэйэлэрин көрүүлэрин, уопсастыбаннай олоххо кыттыы кинилэр олохторугар суолтатын туһунан боппуруостарга бэйэлэрин санааларын, идиэйэлэрин, хоруйдарын эттилэр.

Дьыалабыай оонньуу түмүгүнэн көхтөөх ыччакка өйдөбүнньүк бэлэх туттардылар уонна устудьуоннар суруйбут этиилэрин, санааларын Баҕа санаа капсулатыгар уган, М.К. Аммосов аатынан СӨ Судаарыстыбаннаһын түмэлигэр 5 сылга харалтаҕа уурарга туттардылар.

“Дойдубут ыччаттарын сонун көрүүлэрин, санааларын, этиилэрин болҕомтоҕо ылан үөрэтиэхпит, үлэбитигэр туһаныахпыт” диэн бэлиэтээтэ улуус баһылыга Юрий Слепцов.

Нам ыччатын кытта көрсүһүү биир үөрүүлээх түгэнинэн Айыллаан Винокуров анал бирииһи —  бу кыһын Москва куоракка аан дойдутааҕы волонтёрдар пуорумнарыгар кыттар босхо путевканы оонньотуута буолла. Хатырыктан “Махсыым уолаттара” вокальнай ансамбль “Чулуу Махсыым” ырыаны толордулар. Улуус баһылыга Юрий Слепцов ыччаты  уопсастыбаннай үлэҕэ, тэрээһиннэргэ көхтөөхтүк кытталларыгар, үөрэххэ сыһыаннарын күүһүрдэллэригэр, талан ылбыт идэлэрин сатабыллаахтык баһылыылларыгар санааларын ууран уонна умсугуйан туран дьарыктаналларыгар сүбэлээтэ. Кини “Нам улууһун ыччаттара, бары өрүү биир сомоҕо буолан, Ийэ дойдугутугар бэриниилээх, хаһаайынныы сыһыаннаах буолуҥ. Сахабыт сирэ, улууспут сайдарын туһугар бары биир санаанан салайтаран үлэлиэххэ, үөрэниэххэ” диэн ыҥырда.

+1
0
+1
0
+1
0
+1
0
+1
0
+1
0
+1
0
Бары сонуннар
Салгыы
23 июля
  • 28°C
  • Ощущается: 28°Влажность: 42% Скорость ветра: 4 м/с

Сообщить об опечатке

Текст, который будет отправлен нашим редакторам: