Намҥа 58 ыалга саҥа дьиэ күлүүһүн үөрүүлээх быһыыга-майгыга туттардылар

Дойду Аҕа баһылыга  Владимир Путин көҕүлээһининэн «Олорор дьиэ уонна куорат эйгэтэ» национальнай бырайыагынан «Хаарбах уонна саахалланар туруктаах дьиэлэртэн дьону көһөрүү» өрөспүүбүлүкэтээҕи аадырыстаммыт бырагыраама Нам улууһугар тэтимнээхтик үлэлиир.

Бэҕэһээ, тохсунньу 26 күнүгэр,  Нам улууһун  киинигэр  элбэх кыбартыыралаах түөрт саҥа дьиэ үлэҕэ киириилэрин сиэрэ-туома ыытылынна.

Ол курдук, 39 №-дээх Ленин уонна 2 №-дээх Минияров уулуссаларыгар дьиэлэри «Перспектива» ХЭТ (дир. Вадим Анисимов), 26 №-дээх Аммосов уулуссатыгар «Лигран» ХЭТ (ген. дир. Григорий Кобяков) уонна 59 №-дээх Ст. Платонов уулуссатыгар 2 кыбартыыралаах дьиэни ИП Соловьев В.И. (Владислав Соловьев) тутан киллэрдилэр диэн улуус дьаһалатын пресс-сулууспата иһитиннэрдэ.

Саҥа тутуулар 2023 сыллаахха сыбаайалара түһэн бу сылга үлэҕэ киирдилэр. Бу дьиэлэр бары таас, толору хааччыллыылаах, бары ирдэбилгэ эппиэттииллэр. Бэлиэтээн эттэххэ, «Лигран» ХЭТ туппут дьиэтин бастакы этээһигэр тэрилтэлэр киириэхтэрэ. Ону сэргэ быйыл өссө иккис түһүмэҕэ ыытыллан, эбии 12 кыбартыыраҕа  дьон көһөн киириэҕэ.

Үөрүүлээх арыллыы тэрээһиннэригэр «Ленскэй нэһилиэк» МТ  баһылыга Петр Сокольников, солбуйааччыта Петр Владимиров, улуустааҕы капитальнай тутуу уонна архитектура управлениетын начальнигын э.т. Алексей Кондаков, бэдэрээтчиттэр саҥа дьиэ хаһаайыттарын эҕэрдэлээтилэр, баҕа санааларын тиэртилэр диэн «Нам улууһа» МТ пресс-сулууспата суруйар.