Намҥа ааспыт отчуот түмүгүнэн култуура дьиэтэ ситэриллибитэ бэлиэтэннэ

Бүгүҥҥү күн иккис аҥаарыгар ситэриилээх былаас уорганын Үөһээ Бүлүүгэ отчуота Нам нэһилиэгэр ыытылынна. Быйыл отчуокка 150 киһи кэлбитин бэлиэтээтилэр.

Отчуот иннинэ бырабыыталыстыба отчуоттуур бөлөҕүн салайааччыта, экэниэмикэ миниистирэ Петр Попов Улуу Кыайыы үбүлүөйдээх мэтээлин дойду Бэрэсидьиэнин уонна Ил Дархан аатыттан тыыл бэтэрээнигэр, ытык кырдьаҕаска Семен Данилович Амыдаевка туттарда.

Сыл аайы нэһилиэктэртэн киирбит туруорсууларынан боротокуол оҥоһуллар, онно намнар 7 боппуруостара киирбитэ.
Ол иһигэр быйылгы отчуоттуур мунньах буолбут сирэ — А.Е. Ильина-Дмитриева аатынан култуура дьиэтин тутуутун эбии үбүлээһинэ баар этэ. Былырыын күһүн эбии үп-харчы көрүллэн, быйыл сып-сылаас, сырдык уораҕай ситэри тутуллан үлэҕэ киирбит. Үөрэхтээһин эйгэтигэр былырыын оскуолаҕа хапытаалынай өрөмүөнү, оҕо уһуйаанын тутууну ыытарга туруорсубуттара. Бу боппуруостар билигин быһаарылла сылдьаллар.

Итини таһынан нэһилиэк генеральнай былаанын оҥорорго көмө көрдөөбүттэрэ. Тоҕо диэтэххэ, нэһилиэнньэ кэҥээн, саҥа сири кэҥэтии барара ирдэнэр. Бу боппуруос салгыы быһаарылларын курдук, быйылгы отчуот боротокуолугар эмиэ киллэрилиннэ.

Өссө биир туруорсуунан Элбэх өҥөнү оҥорор киин дьиэтин туттарыыта буолар. Кэнники сылларга улуустарга сылдьан көрдөххө, маннык элбэх тэрилтэ киирэр киинэ бары өттүнэн барыстаах эбит.

Нам нэһилиэгэр өрүс кытылын бөҕөргөтүү эмиэ тыын суолталаах боппуруоһунан буолар. Нэһилиэк бибилэтиэкэтин сэбиэдиссэйэ Уйгулаана Саввинова тыа сирин бибилэтиэкэлэрин дьиэлэрэ тымныыларынан, хапытаалынай өрөмүөннэри ыытарга, граннарга кыттар тэрилтэлэргэ көмө оҥорорго, болҕомтоҕо ыларга көрдөстө.

Нам олохтооҕо Егор Пестряков нэһилиэк устуоруатын сырдатар түмэл дьиэтин, тулаайахтарга бэриллибит дьиэлэр эргэрэн хапытаалынай өрөмүөнү туруоруста. Саҥа култуура дьиэтин харабыла Ирина Бетту эбии тэхэньиичэскэй үлэһиттэр штаттарын көрөллөрүгэр көрдөстө.

Олохтоохтор босхо эми тыа сиригэр тиэрдии, ыарыһах, инбэлиит киһи мэдиссиинэ хамыыһыйатын ааһара, чуолаан, куоракка тиийдэххэ, исписэлиис быраастарга хос көрдөрүүнү ааһар уустуктардааҕын этиннилэр.

Нэһилиэк орто оскуолатын дириэктэрэ Василий Петров оскуола хапытаалынай өрөмүөнүн туруоруста. Нам олохтоохторо балыыһаҕа быраас тиийбэтин, оҕо уһуйаанын эбийиэктэрин хапытаалынай өрөмүөннэрин, Харбалаах — Нам икки ардыларынааҕы федеральнай суол, бэлиэлэр уонна сатыы киһи хаамар сирин оҥоһуллуутун, тыраассаҕа сырдатыыны туруорустулар.