Намҥа Бэтэрээннэр сэбиэттэрэ ахтыы киэһэтин тэрийдэ

Ахсынньы 12 күнүгэр Нам улууһугар өрөспүүбүлүкэ бэтэрээннэрин сэбиэтэ тэриллибитэ 35 сыллаах үбүлүөйүн бэлиэтээтилэр.

Сүрүн тэрээһини Нам улууһун  дьаһалтата уонна Софья Кобякова салайар улуус бэтэрээннэрин сэбиэтэ көҕүлээн ыыттылар.

Бу туһунан улуус дьаһалтатын пресс-сэкирэтээрэ Анастасия Корякина бу курдук кэпсээтэ:

— Сарсыардатттан саҕалаан Нам сэлиэнньэтин  саха балаҕаныгар киин балыыһа эмчиттэрэ аҕам саастаах дьон доруобуйаларын көрдүлэр, саахар, холестерин, хаан толору  анаалыстарын оҥордулар, ЭКГ-га түһэрдилэр, харах дабылыанньатын, хаан баттааһынын кээмэйдээтилэр. Онтон Н.М. Рыкунов аатынан Намнааҕы киин бибилэтиэкэ ааҕар саалатыгар СӨ кинематографиятын бэтэрээннэрин уопсастыбаннай түмсүүтүн бэрэссэдээтэлэ, П.И. Дудкин аатынан Дьокуускайдааҕы сибээс уонна энэргиэтикэ  кэллиэһин үрдүк категориялаах преподавателэ,  СӨ култууратын туйгуна, РФ профессиональнай орто анал үөрэхтээһинин Бочуоттаах үлэһитэ, РФ, СӨ Бочуоттаах бэтэрээнэ Полина Лепчикова “Олоҕум айана – дьылҕам кэрчиктэрэ» айар үлэтин быыстапката тэрилиннэ.

Улуус  дьаһалтатыгар  бэтэрээннэри үөрүүлээх быһыыга-майгыга чиэстээтилэр.  “Нам улууһа» МТ баһылыга Юрий Слепцов аҕам саастаах дьону истиҥник эҕэрдэлээн туран, Нам улууһугар Матрена Петрова саҕаттан бу күҥҥэ диэри бэтэрээн сэбиэтэ таһаарыылаахтык үлэлээн кэлбитин сиһилии  сырдатта.

— Биһиги улуу биир дойдулаахтарбытын, биллиилээх судаарыстыбаннай уонна бэлитиичэскэй диэйэтэллэр Максим Аммосов уонна Илья Винокуров курдук дьоммут ааттарын, олохторун, үлэлэрин-хамнастарын үйэтитии, эдэр көлүөнэҕэ тиэрдии  бэтэрээн сэбиэтин —  биир сүрүн соруга. Чөл олоҕу тутуһууга бэтэрээннэрбит эмиэ инники күөҥҥэ сылдьаллар. Улууска сыл аайы хотугу нэһилиэктэр бэтэрээннэрин спартакиадата  ыытыллар. Быйылгыттан бу хамсааһыҥҥа соҕуруу нэһилиэктэр кытыннылар. Эһиилгиттэн бу тэрээһин улуус былааныгар киирэн, сыл аайы ыытар үгэс олохтонуо. Ол курдук, спартакиада хоту, соҕуруу, Ленскэй нэһилиэк диэн бөлөхтөргө араарыллан, биир бастыҥ бэтэрээн хамаандата быһаарыллыаҕа.

Улуус, нэһилиэк баһылыктарын уҥа илиилэринэн, чугас сүбэһиттэринэн  бэтэрээннэр сэбиэттэрэ буолаллар. Аҕам саастаах дьоммут олоҕу көрүүлэрэ, этиилэрэ, норуокка чугас дьон быһыытынан күннээҕи сүбэлэрэ-амалара олус наадалаах, сыаналаах. Ыччаты кытта үлэҕэ үөрэх тэрилтэлэринээн ыкса сибээһи олохтоон, ситимнээхтик үлэ барар.  Бэтэрээн сэбиэттэрин үлэлэрэ-хамнастара бүтүн улуус үлэтин, ситиһиилэрин көрдөрөллөр, — диэн баһылык Юрий Слепцов бэлиэтээтэ.

Ытык дьоммут Феврония Ушницкая  уонна Иннокентий Иванов бэйэлэрэ улуустарыгар салайбыт  бэтэрээннэр сэбиэттэрин үлэтин астына аҕыннылар.

Тэрээһин  түмүктүүр чааһыгар улуус баһылыга Юрий Слепцов СӨ Ытык сүбэтин салайааччыта Люлия Григорьеваны кытта сүбэлэһэн баран, 2023 сылтан Нам улууһугар  өр сылларга салайар үлэҕэ үлэлээбит, бэтэрээннэр сэбиэттэрин таһаарыылаахтык салайбыт Матрена Петрова уонна Евдокия Рожина ааттарынан анал бириэмийэ олохтонорун иһиттиннэрбитин, улуус ытык кырдьаҕастара олус үөрэ истибиттэрин, дохсун ытыс тыаһынан биллэрдилэр.