Намҥа эр киһи ойоҕун быһаҕынан бааһырдыбыт

Нам улууһугар полиция үлэһиттэрэ ойоҕун быһаҕынан бааһырдыбыт, урут массыына уоран сууттаммыт 38 саастаах эр киһини тутан хаайдылар. Дьиэ кэргэн профилактическай учуокка турара, урут даҕаны быраабы араҥаччылыыр уорганнар болҕомтолоругар киирбитэ биллэр.

Силиэстийэҕэ быһаарыллыбытынан, киэһэлик эр киһи арыгы иһэн итирэн баран, ойоҕо уонна саастарын ситэ илик оҕолоро олорор дьиэтигэр кэлбит. Этиһии-охсуһуу кэмигэр быһаҕы харбаан ылан, дьахтары хаста да анньыбыт. Куттаммыт оҕолор таһырдьа сүүрэн тахсан, ыалларыттан учаастактааҕы полиция үлэһитин ыҥыртарбыттар. Кэлбит полиция үлэһиттэрэ утарыласпыт эр киһини туппуттар. Эмсэҕэлээбит дьахтар балыыһаҕа киирбит. Тутуллубут киһиэхэ «Соруйан доруобуйаҕа чэпчэки эчэйиини оҥоруу» уонна «Өлөрүүнэн эбэтэр доруобуйаҕа ыар эчэйиини оҥоруунан куттааһын» ыстатыйаларынан холуобунай дьыалалар тэрилиннилэр. Маны таһынан, полиция үлэһиттэригэр утарыласпытын иһин административнай боротокуол оҥоһулунна, диэн ИДьМ пресс-сулууспата иһитиннэрэр.