Намҥа өр сылга бииргэ олорбут дьиэ кэргэттэри кытта көрүстүлэр

Социальнай пуонда Саха сиринээҕи  отделениетын Намнааҕы биэнсиэйэ салаатын  иһинэн «Сайдыы» аҕам саастаахтары кытта алтыһыы киинэ үлэлиир.

Манна аҕам саастаахтарга анаан араас тэрээһиннэр, маастар-кылаастар,  интэриэһиргиир боппуруостарга  исписэлиистэри ыҥыран сүбэ-ама биэрэллэр.

Дьиэ-кэргэн, таптал уонна бэриниилээх буолуу күнүгэр  өр сылларга бииргэ олорбут дьиэ кэргэттэргэ анаан  сэргэх тэрээһин ыытылынна. Сулууспа салайааччыта Бурцев Евгений Михайлович эҕэрдэ тылын кэнниттэн үлэһиттэр ыҥырыылаах дьиэ кэргэттэргэ сибэкки дьөрбөтүн, өйдөбүнньүк бэлэхтэрин туттардылар. Култуура отделын үлэһитэ Цыпандина-Куличкина Вера Прокопьевна алгыс тылынан айхаллаан, тойук туойан уруйдаан алҕаабытын кэннэ, толору астаах остуолга ыҥыран, быырпаҕынан, арыылаах алаадьынан, сахалыы саламаатынан күндүлээтилэр. Остуол тула олорон дьиэ кэргэҥҥэ сыһыаннаах боппуруостарга эппиэттээн, санаа атастаһан, күрэхтэһэн, түмүгэр оһуохайдаан олус астынан, санаа көтөҕүллэн дьиэлээтибит. Намнааҕы пенсионнай отдел иһинэн үлэлиир саастаах дьону кытта алтыһыы сулууспатын үлэһиттэригэр инникитин айымньылаах үлэни, ситиһиини баҕарабыт.

Нина Саввина, Нам, Аппааны