Намҥа Кыһыл кинигэҕэ киирбит хатыыһы бултаабыт убайдыы бырааттыылары туттулар

Анал тэрээһин кэмигэр тырааныспар полициятын Хотугу-Илиҥҥи линейнэй управлениетын үлэһиттэрэ, Балыктааһын федеральнай аҕыныстыбатын Саха сиринээҕи иниспиэктэрин кытта, Өлүөнэ өрүскэ сокуону кэһэн уу биологическай ресурсаларын бултуу сылдьар икки олохтооҕу туттулар.

Нам улууһугар Өлүөнэ өрүһү кэтии сылдьан, тырааныспар полицейскайдара 78 саастаах олохтоох киһи салайан иһэр мотуордаах оҥочотун бэлиэтии көрбүттэр. Оҥочоҕо кинини кытта 74 саастаах бииргэ төрөөбүт быраата баар эбит. Полицейскайдар оҥочо иһиттэн РФ Кыһыл кинигэтигэр киирбит сыаналаах балык 15 устуукатын – Сибиир хатыыһын  булбуттар. Сокуону кэһэн тутуллубут балык барыта айылҕаҕа тыыннаахтыы ыытыллыбыт.

Тырааныспар сириэстибэтэ уонна булт тэрилэ былдьаммыт. Билиҥҥи туругунан, ИДьМ тырааныспарга Хотугу-Илиҥҥи линейнэй управлениетын матырыйаалларынан Арассыыйа Силиэстийэлиир кэмитиэтин тырааныспарга Илин эҥээрдээҕи эрэгийиэннэр икки ардыларынааҕы силиэстийэлиир управлениетын Дьокуускайдааҕы отделынан бырааттыыларга РФ Холуобунай кодексатын 258.1 ыстатыйатын 3-с чааһынан холуобунай дьыала тэрилиннэ. Уорбаланааччыларга аҕыс сылга диэри көҥүллэрин быһыы уонна икки мөлүйүөн солкуобайга диэри ыстараап куттала суоһуур, диэн ИДьМ Уһук Илин федеральнай уокуруктааҕы тырааныспарга управлениетын пресс-сулууспата суруйар.