Намҥа оҕо успуордун сайыннарыы туһунан кэпсэттилэр

Нам улууһугар оҕо успуордун дэкээдэтин чэрчитинэн, «Развитие детского спорта в Намском улусе: актуальные проблемы, пути их решения» төгүрүк остуол буолла.

Бу туһунан улуус дьаһалтатын саайтыгар суруллар. Ол курдук, төгүрүк остуолу улуус баһылыгын солбуйааччы Юрий Дьяконов салайан ыыппыт. Кэпсэтиигэ нэһилиэктэр баһылыктара, үөрэх, спортивнай тэрилтэлэр, управление, улуус спортивнай холбоһуктарын бэрэстэбиитэллэрэ кыттыыны ылбыттар. Оҕолору физкултууранан уонна успуордунан тиһиктээхтик дьарыктаналларыгар тардарга, угуйарга, күрэхтэһиилэргэ кытталларыгар көх-нэм буоларга сыал-сорук туруоруллара ирдэнэрин бэлиэтээбиттэр, санааларын үллэстибиттэр. Оҕо успуордун сайыннарарга оскуолаларга материальнай-тэхиньиичэскэй бааза ситэтэ суоҕа, каадыр тиийбэтэ, оҕолору успуорка күүскэ көҕүлүүр ирдэнэрэ ыйыллыбыт.

Оҕо успуордун сайыннарыы сүрүн хайысхаларын олоххо киллэрэргэ былаан быһыытынан кэлим бырагыраама оҥоһуллубут.

Улууска П.П.Юмшанов аатынан спортивнай тустуу оскуолата, «Олимпик», Н.С.Тимофеев аатынан спортивнай оскуолалар ситиһиилээхтик үлэлииллэр. Оскуолалар сүрүн хайысхаларынан спортивнай тустуу, буокса, волейбол, чэпчэки атлетика, гиирэ успуорда, кикбоксинг, футбол, дуобат уонна шахмат буолаллар. Улуус успуорка оскуолаларын иитиллээччилэрэ өрөспүүбүлүкэтээҕи, Арассыыйатааҕы күрэстэртэн мэтээллээх кэлэн дьоннорун-сэргэлэрин үөрдэллэр. Улуус сүүмэрдэммит хамаандалара спартакиадаларга, күрэхтэһиилэргэ ситиһиилээхтик кытталлара бэлиэтэнэр.

Төгүрүк остуол түмүгэр оскуолалар, спортивнай тэрилтэлэр салайааччыларыгар, баһылыктарга оҕолор успуордунан, физкултууранан тиһиктээхтик дьарыктаналларын өйүүргэ, улуус бары нэһилиэнньэлээх пууннарыгар физкултууранан, успуордунан дьарыктаныыны көҕүлүүргэ сорук туруоруллубут. Чэгиэн олоҕу пропагандалааһыҥҥа көдьүүстээхтик бииргэ үлэлээһин этиллибит. Тэрээһиҥҥэ 55 киһи кыттыыны ылбыт. Бу туһунан Нам улууһун дьаһалтатын пресс-сулууспата иһитиннэрэр.