Намҥа саҥа оскуола үлэҕэ киириэ

Намҥа 450 миэстэлээх 2 №-дээх оскуола тутуута быйыл түмүктэниэҕэ.

Бу туһунан СӨ Ил Дархана Айсен Николаев «Саха» ГТРК «Прямой разговор» биэриигэ эттэ. Үөрэх тэрилтэтэ 70-тан тахса бырыһыан бэлэм буолбут.

—Тутуу былаан быһыытынан баран иһэр. Эбийиэк 70-тан тахса бырыһыан бэлэм. СӨ судаарыстыбаннай бүддьүөтүгэр быйылгы сылга үлэни түмүктүүргэ 146 мөл. кэриҥэ харчы көрүлүннэ. 2026 сылга Нам 2 №-дээх оскуолата саҥа дьиэҕэ көһөрүгэр эрэнэбин, — диэн бэлиэтиир кини.

Билиҥҥи туругунан дьиэ тас уонна ис истиэнэлэрэ оҥоһуллубуттар. Сүрүн инженернэй ситимнэрэ тардыллыбыттар, о.д.а. үлэ ыытыллыбыт.

—Оҕолор үөрэнэллэригэр манна киэҥ-куоҥ, табыгастаах буолуоҕа. Мин оҕолор тустарыгар ис сүрэхпиттэнг үөрэбин. Намҥа эрэ буолбакка, өрөспүүбүлүкэ атын да нэһилиэнньэлээх пууннарыгар маннык оскуолалар тутуллаллар, онно оҕолор аныгы олох ирдэбилигэр эппиэттиир усулуобуйаҕа үөрэнэр, хаачыстыбалаах үөрэҕи ылар кыахтаналлар, — диэн этэр Айсен Николаев.

Ил Дархан Ил Түмэҥҥэ Туһаайан этиитигэр кэнники биэс сылга тутуу тэтимэ уонунан сыллары баһыйарын бэлиэтээбитэ. 2020 сылтан 62 оскуола уонна 32 уһуйаан үлэҕэ киллэриллибит. Үөрэх кыһатын сүүстэн тахса эбийиэгэр, ол иһигэр арктическай оройуоннары киллэрэн туран, хапытаалынай өрөмүөн ыытыллыбыт. 40 тыһ.тахса оҕо табыгастаах тупсаҕай усулуобуйаҕа үөрэнэр кыаҕы ылбыт. РФ Бэрэсидьиэнэ Владимир Путин көҕүлээбит «Үөрэхтээһин» национальнай бырайыагын иитинэн кэккэ үлэлэр ыытыллыбыттар. Бу үлэ сыалын-соругун бүгүн «Ыччат уонна оҕо» национальнай бырайыак салгыыр.

Сиһилии: https://www.sakha.gov.ru/news/18763

СӨ Ил Дарханын уонна Бырабыыталыстыбатын пресс-сулууспата

ЯСИА хаартыската