Намҥа Суоппардар өрөспүүбүлүкэтээҕи сүлүөтүгэр улуустарынан хамаандалар күрэхтэстилэр

Бэс ыйын 14 күнүгэр Нам улууһун «Эҥсиэли» култуура уонна сынньалаҥ пааркатыгар улахан уйуктаах урбаанньыт суоппардар VII өрөспүүбүлүкэтээҕи сүлүөттэрэ үрдүк таһымҥа ыытылынна.

Тэрээһиҥҥэ Амма, Үөһээ Дьааҥы, Горнай, Мэҥэ Хаҥалас, Ньурба, Таатта, Уус Таатта, Уус Алдан, Хаҥалас, Чурапчы уонна Нам хамаандалара муһуннулар. Бу туһунан улуус дьаһалтатын пресс-сулууспата суруйар.

Хотунан-соҕуруунан, сири-сибиири тэлэһийэ сүүрэр улахан уйуктаах массыыналар суоппардара, ытык бэтэрээннэрэ парадтаан киирдилэр. Сахалыы сиэринэн Афанасий Федоров – Охонооһой аал уоту оттон, арыылаах алаадьынан айах тутан Айыылартан көрдөстө.

Эҕэрдэ тылларын улуус баһылыга Юрий Слепцов, СӨ Тырааныспарга уонна суол хаһаайыстыбатыгар миниистирэ Владимир Сивцев, өрөспүүбүлүкэ улахан уйуктаах, ыраах айаннаах суоппардарын түмсүүтүн бэрэссэдээтэлэ Николай Мочкин уонна улуустар бэрэстэбиитэллэрэ эттилэр. Бу уустук идэҕэ бэриниилээхтик үлэлии-хамсыы сылдьар суоппардарга, ытык бэтэрээннэргэ наҕараадалары туттардылар. «РФ көлөтүн Бочуоттаах үлэһитэ» бочуоттаах аат СӨ тимир көлөтүн үтүөлээх үлэһитэ, СР Ытык Сүбэтин бочуоттаах чилиэнэ Николай Пономаревка иҥэрилиннэ. «Үлэ килбиэнэ» ааты Матвей Ардаховка иҥэрдилэр. «СӨ Ытык кырдьаҕаһа» бэлиэни туттулар: Сардана Постникова, урбаанньыт; Иван Гоголев, үлэ бэтэрээнэ, Нам улууһун Ытык киһитэ; Никита Иванов, Арассыыйа көлөтүн үтүөлээх үлэһитэ; Николай Гоголев, СӨ көлөтүн бочуоттаах үлэһитэ, Абаҕа нэһилиэгин Бочуоттаах олохтооҕо; Митрофан Иустинов, СӨ көлөтүн үтүөлээх үлэһитэ. Оттон «СӨ көлөтүн үтүөлээх үлэһитэ» ааты Гаврил Новгородов уонна Петр Сергучев туттулар.

«СӨ олох-дьаһах хомунаалынай хаһаайыстыбатын уонна энергетикатын сайдыытыгар үтүөтүн иһин» бэлиэнэн Никита Нератов бэлиэтэннэ. «Нам улууһа» МР сайдыытыгар кылаатын иһин» Дьулустаан Готовцев, Касьян Местников, Никита Нератов, Петр Семенов наҕараадаланнылар.
Күн иккис аҥарыгар суоппардар хапсаҕайга, мас-рестлиҥҥэ, кубаалданы быраҕыыга, көлүөһэни таҥыыга, УАЗ массыынаны соһууга, эстафетаҕа уонна канат тардыһыыга күүстэрин холоннулар. Ону сэргэ суоппардар дьиэ кэргэттэрин икки ардыларыгар «Саха талба таҥаһа» куонкурус уонна «Сайыны уруйдуу» эстраднай ырыа куонкуруһа ыытылынна.

Бу курдук, дьон туһа диэн чысхааннаах тымныыга түүннэри-күнүстэри түбүгүрэн ас-таҥас, араас тутуу матырыйаалын, тиэхиньикэни, туттар сэби-сэбиргэли таһар, уустук үлэлээх дьоммут сылга биирдэ көрсөн күннэрин үөрэ-көтө атаараллар. Араас күрэхтэргэ кыттаннар күүстэрин холоннулар, бириис арааһын сүүйдүлэр.

Тыҥааһыннаах киирсии кэнниттэн бастакы миэстэни — Чурапчы, иккиһи  — Уус Таатта уонна үһүс миэстэни — Таатта улууһун хамаандалара ылан үөрүү-көтүү аргыстаннылар.