Намҥа сүппүт аҕам саастаах киһи таҥаһын буллулар

Быыһааччылар Нам улууһун Кириэс Кытыл сэлиэнньэтигэр сүппүт 1944 с.т. эр киһини көрдүүллэрин туһунан биэдмистибэ эрдэ иһитиннэрбитэ.

Намнааҕы көрдүүр-быыһыыр этэрээт быыһааччылара, эр киһи аймахтара, олохтоохтор көрдүүллэр.

 «Күнүскэ диэри биэс хамаандаҕа хайдан, нэһилиэк арҕаа өттүн көрдүбүт, тумуска тиийэ. Ол эрээри суолун да булбатыбыт. Нэһилиэккэ баар быраҕыллыбыт дьиэлэри барытын кэрийдибит. Эбиэттэн киэһэ өрүс боротуокатын диэкиттэн ырбаахытын буллубут, аймахтара бигэргэттилэр. Суола элбэх, ол гынан баран хаһан сылдьыбытын быһаарар уустуктардаах. Боротуока кини дьиэтин аттыгар баар. Чугастааҕы арыыны эмиэ көрдүбүт. Икки дрон көттө, эмиэ туох да түмүгү аҕалбата.

Билигин да көрдүүбүт, түүнү быһа сылдьыахпыт», — диэн Намнааҕы пост начаалынньыга Константин Федоров иһитиннэрэр.

Дьокуускайтан тепловизордаах беспилотнигы илдьэ быыһааччылар быһылаан буолбут сиригэр туруннулар.