Намҥа сүппүт биэнсийэлээҕи көрдөөһүҥҥэ водолазтар уонна кинологтар таҕыстылар

Нам улууһугар Кириэс-Кытыл сэлиэнньэтин олохтооҕун, балаҕан ыйын 1 күнүгэр сүппүт кырдьаҕас киһини 50-ча киһи көрдүүр. Көрдөөһүҥҥэ водолазтар уонна кинологтар кыттыстылар, диэн Саха сиринээҕи Быыһыыр сулууспата иһитиннэрэр.

Бүгүн көрдүүр үлэлэр түөрт хайысханан ыытыллыахтара. Волонтердар сүрүн бөлөхтөрө сэлиэнньэ арҕаа өттүнээҕи сири-уоту көрүөхтэрэ, оттон атын бөлөх — сэлиэнньэ иһинээҕи тутуулары бэрэбиэркэлиэҕэ. Ону таһынан, сэлиэнньэҕэ сыста сытар сирдэргэ квадрокоптер көмөтүнэн көрдүүллэр. Водолазтар үрэх уутун чинчийэллэр. Итини таһынан көрдөөһүҥҥэ ИДьМ кинологтара кыттыстылар.

Санатан эттэххэ, Кириэс-Кытыл сэлиэнньэтигэр балаҕан ыйын 1 күнүгэр 81 саастаах биэнсийэлээх сарсыарда дьиэтиттэн тахсан баран төннүбэтэх. Балаҕан ыйын 2 күнүгэр көрдүүр бөлөх үрэх аттыттан сүппүт киһи ырбаахытын уонна суолун булбута.