Намҥа төрөппүттэр бэрээдэги көрөллөр-истэллэр

Оскуола үөрэнээччилэригэр күһүҥҥү сынньалаҥнара саҕаламмытынан, Нам сэлиэнньэтигэр төрөппүттэр  «Болҕойуҥ! Каникул!» бэрээдэги араҥаччылыыр үлэлэрэ саҕаланна. 

Төрөппүттэр алтынньы 27 күнүттэн сэтинньи 4 күнүгэр диэри уочаратынан эриэйдэлэргэ сылдьаллар.

«Оҕо доруобуйатын харыстыыр уонна буруйу оҥорору тохтотор сыалтан, сокуоннай сааһын туола илик оҕо 22.00 чаастан уулуссаҕа, уопсастыбаннай сирдэргэ төрөппүтэ эбэтэр эппэкиинэ суох сылдьыа суохтаах. Соҕотох сылдьан тутуллубут оҕо төрөппүттэригэр тиэрдиллэр. Маннык түгэҥҥэ төрөппүт административнай миэрэҕэ тардыллыан сөп. Хас биирдии төрөппүт оҕотугар эппиэтинэс сүгэрин өйдүөхтээх уонна оҕоттон күннээҕи эрэсиими тутуһарын ирдиэхтээх. Улаатан эрэр оҕолор 22.00 ч кэнниттэн уопсастыбаннай сирдэргэ, уулуссаҕа тахсыылара аччаабат. Бүгүҥҥү күҥҥэ таһырдьа тымныйан, сылаас сирдэргэ  мусталлар. Холобура, 23.00 ч хойукка диэри үлэлиир маҕаһыыннарга сылдьар буолаллар», — диэн  Ленскэй нэһилиэгин олохтоох дьаһалтатын исписэлииһэ Анна Слепцова иһитиннэрбитин «Эҥсиэли» хаһыат телегам-ханаалыгар суруйда.

Сэбиэскэй кэмҥэ төрөппүттэр эриэйдэлэрэ, норуот дружинниктара, хомсомуоллар бу курдук бэрээдэги көрөр-истэр буолан, оҕолор буруйу оҥоруулара, уопсастыбаннай миэстэлэргэ бэрэдээктээхтик сылдьыылара кэтэнэрэ олус туһалаах этэ. Онон бэртээхэй үгэс Нам улууһугар сөргүтүллэн эрэрэ хайҕаллаах суол.