Намҥа үс үөрэнээччи гараас иһиттэн минньигэс ас уорбуттар

Нам улууһун полицията урбаанньыт гарааһыттан уоруу дьыалатын арыйда. Эр киһи полиция дьуһуурунай чааһыгар гарааһыттан 6 тыһыынча солкуобайтан тахса сыаналаах табаара сүппүтүн туһунан иһитиннэрбит.

Полиция үлэһиттэрэ уорууга уорбаланар үс 14 саастаах үөрэнээччини быһаардылар. Кинилэртэн биирдэстэрэ урут сэрэтэр-профилактическай учуокка турбут. Күнүс уолаттар гарааһы көрөн, чааһынай дьиэ тиэргэнигэр сытар сүгэни ылан, ааны алдьатан киирбиттэр. Иһиттэн гаастаах утахтары уонна минньигэс астары уоран баран, кистээбиттэр. РФ Холуобунай кодексатын 158-с ыстатыйатын 2-с чааһынан («Уоруу») холуобунай дьыала тэрилиннэ. Бу ыстатыйанан уорбаланааччылар биэс сылга диэри көҥүллэрэ быһыллыан сөп диэн ИДьМ пресс-сулууспата иһитиннэрэр.