Намнааҕы тиэхиньукум устудьуоннара — бастыҥнар кэккэлэригэр

Аҕыйах хонугунан, бэс ыйын 15 күнүгэр, Граф Биэрэгэр баар Намнааҕы тиэхиньукум 60 сыллаах үбүлүөйүн бэлиэтиэҕэ.

60-с сыллар саҥаларыгар Нам оройуонугар тыа хаһаайыстыбатын салаалара балысханнык сайдан, тырахтарыыстар уонна суоппардар тиийбэттэриттэн биир сыллаах куурустары аһар сорук турбута. Ити кэмтэн ыла куорсун анньыммыт орто анал үөрэх кыһатыгар күн бүгүн өрөспүүбүлүкэ бары улуустарын ыччаттара үөрэнэн, араас идэлэри баһылыыр кыахтаннылар.

2019 сыллаахха  тиэхиньукум Арассыыйа 100 бастыҥ үөрэҕин кыһатын реестригэр киирбитэ. 2020 сылга “Үөрэхтээһин” национальнай бырайыак чэрчитинэн орто анал үөрэх кыһата аныгы технология ирдэбилигэр эппиэттиир сыыппаранан үөрэх эйгэтигэр үлэлиир  икки кэбиниэти олоххо киллэрбитэ. Билигин бу тиэхиньикумҥа балыгы иитээччи идэтигэр кытта үөрэтэллэр. Үөрэх кыһата Владивостоктааҕы Муора кэллиэһин кытта дуогабардаһан үлэлиир.

Намнааҕы тиэхиньукум сыл аайы идэлэригэр бастыҥнары быһаарар өрөспүүбүлүкэтээҕи куонкуруска ситиһиилээхтик кыттар.

— Быйыл биһиги устудьуоннарбыт күөн күрэс 11 түһүмэҕэр кыттыыны ыллылар: 7 сүрүн, 4 –“юниорскай” этааптар. Сүрүн түһүмэх – килиэп буһарыыта, ас астааһына, аччыгый кыамталаах массыына өрөмүөнэ, графическай дизайн, сылгы сиэлинэн оҥоһук ускуустубата. Чөмпүйэнээккэ Намтан, Жатайтан, Дьокуускайтан уонна Нерюнгриттэн кыттыыны ылбыттара. Биһиги тиэхиньукуммут бу тэрээһиҥҥэ тэҥнээҕин булбата диэххэ сөп: үс 1-кы миэстэ  уонна икки бириистээх 3-с миэстэ, — диэн тиэхиньукум салайааччыта Ньургустан Жирков кэпсээтэ.

Намнааҕы тиэхиньукум 60 сыллаах үбүлүөйүгэр анаан бүгүҥҥү үлэ-хамнас туһунан орто анал үөрэх кыһатын дириэктэрэ Ньургустан Жирковы  кытта кэпсэтиини “Саха сирэ” хаһыат чэппиэрдээҕи нүөмэригэр ааҕыҥ.