Намнааҕы үөрэҕирии түмэлин сөргүтүү үлэтэ барар

Намнааҕы норуот үөрэҕириитин түмэлэ 1982 сыллаахха аһыллыбыта.

Түмэл 30-тан тахса сыл үлэлээн баран, 2014 сыллаахха анал дьиэтэ-уота суох хаалан, матырыйааллары араас сиринэн көһөрө сылдьан харайарга күһэллибиттэрэ. Норуот үөрэҕириитин түмэлигэр араас сылларга салайааччыларынан үлэлээбит Валентина Михайловна Шапошникова, Ольга Николаевна Колесова, Лина Михайловна Полякова муспут матырыйааллара улууска үөрэҕирии сайдыытын баай устуоруйатын кэрэһэлииллэр.

Түмэл матырыйаалларын туһанан Л.М. Полякова 2015 сыллаахха “Светоч земли Намской”, Е.И. Шарапова 2023 сыллаахха «Педагогическая слава Намского улуса» үс туомнаах кинигэлэри күн сирин көрдөрбүттэрэ.

Бу күннэргэ Үөрэҕирии түмэлэ сөргүтүллэн, Нам сэлиэнньэтин “Түөлбэ” оҕо киинигэр үлэлээн эрэрин туһунан улуустааҕы үөрэх управлениетын исписэлииһэ Елена Ивановна Шарапова иһитиннэрдэ.

Сөргүтүү түбүктээх үлэтигэр Намнааҕы педколледж устудьуоннара, ону сэргэ улуустааҕы педагогическай Үлэ бэтэрээннэрин сэбиэтэ матырыйааллары абырахтааһыҥҥа, сааһылааһыҥҥа, истиэндэлэри оҥорууга күүс-көмө буолаллар.

Түмэл тохсунньутааҕы улуус үөрэҕин үлэһиттэрин сүбэ-мунньаҕар үөрүүлээх быһыыга-майгыга аһыллара былааннанар диэн Нам улууһун дьаһалтатын пресс-сулууспата иһитиннэрэр.