Намҥа Култуура уонна духуобунай сайдыы дыбарыаһа аһылынна (ВИДЕО)

Бүгүн, ахсынньы 25 күнүгэр, саха норуотун уһулуччулаах судаарыстыбаннай уонна бэлитиичэскэй диэйэтэлэ, Саха Автономиятын төрүттэспит Максим Кирович Аммосов төрөөбүтэ 125 үбүлүөйдээх сылын чэрчитинэн, төрөөбүт-үөскээбит Намын улууһугар Култуура уонна духуобунай сайдыы дыбарыаһа аанын тэлэччи аста.

Култуура дыбарыаһын бырааһынньыктааҕы аһыллыытыгар Ил Дархан Айсен Николаев кытынна. Үөрүүлээх түгэн сиэригэр-туомугар Ил Дархан Айсен Николаев уонна Ил Түмэн бэрэссэдээтэлэ Алексей Еремеев Нам улууһун олохтоохторугар уонна тутааччыларга Бочуотунай грамоталары, махтал суруктары, өйдөбүнньүк бэлиэлэри туттардылар.
«Саха норуотун чулуу уола М.К.Аммосов 125 сааһын бэлиэтиир үөрүүлээх күнүгэр кини аатынан Култуура дыбарыаһын аһыллыытыгар кыттарбынан, кэлэн турарбынан киэн туттабын. Дойдуга үөскээбит уустуктары аахсыбакка, Култуура дыбарыаһа болдьоҕор тутуллан бу тоҕоостоох кэмҥэ киирбитэ үөрүүлээх. Биһиги саха норуотугар сырдыгы сахпыт, автономияны олохтоон Арассыыйа састаабыгар киллэрэн, саха норуота сайдар тускулун оҥорбут чулуу дьоннорбут — Платон Ойуунускай, Максим Аммосов, Исидор Барахов үтүө ааттарын умнубаппыт. Саха сирин көҥүлүн туруорсубут үтүө дьоммут өтө көрүүлэрэ туолан, өрөспүүбүлүкэ Арассыыйа туруктаах сайдыытыгар тирэх буолла. Бу өрөгөйдөөх үбүлүөйдээх сылга биһиги элбэҕи ситистибит, өссө даҕаны дойдуга буола турар уустуктары аахсыбакка, Сахабыт сирин сайыннарарга үлэлиэхпит-хамсыахпыт», – диэн бэлиэтээтэ Айсен Николаев.

«Бүгүн долгутуулаах күн, биһиги биир дойдулаахпыт, Саха норуотун улуу уолаМ.К.Аммосов аатынан Култуура дыбарыаһа тутуллан  үлэҕэ киирбитэ бу Нам олохтоохторугар олус үчүгэй бэлэҕинэн буолар. М.К. Аммосов аата үйэтитиллэригэр намнар бары кыттыгастаахтар, ол курдук уустук кэмнэргэ умнубакка, улуу киһибитин ааттата сылдьаллар», — диэн Алексей Еремеев эттэ.

Нам олохтоохторо Ил Дархан Айсен Николаевка эппит тылыгар туран, улуу киһи 125 сааһын бэлиэтиир үбүлүөйдээх күҥҥэ Култуура дыбарыаһын туттаран киллэрбитин иһин дохсун ытыс тыаһынан махтаналларын биллэрдилэр.
Саҥа тутуу архитектурата уустук оҥоһуулаах, банкеттыыр саалата ураһа быһыылаах, бырайыак дизайн-бырайыагын быһыытынан национальнай стиллээх. Саҥа киэҥ-куоҥ уораҕай үс мэндиэмэннээх, уопсай иэнэ 5692 кв. м. Манна 400 миэстэлээх көрөр саала, Нам улууһун Култуураҕа уонна духуобунай сайдыыга управлениета, А.Ф. Шестаков аатынан норуот айымньытын дьиэтэ, Н.М. Рыкунов аатынан Намнааҕы кииннэммит бибилэтиэкэ ситимэ, П.И. Сивцев аатынан Намнааҕы устуоруйа уонна этнография мусуойа, ЗАГС отдела, Национальнай уус-уран мусуой Намнааҕы филиала киирэн, толору аныгылыы тэриллэн, малынан-салынан хааччыллыбыттар.

Эрдэ эппиппит курдук, Култуура саҥа уораҕайа национальнай култуура улахан комплексын киининэн буолуоҕа. Манна кэккэлэһэ саха уһулуччулаах бэйээтэ, Нам улууһун биир киэн туттар киһитэ Илья Винокуров-Чаҕылҕан мусуойа, саха национальнай архитектурата стиллээх дьиэлэр, Максим Аммосов аатынан болуоссат баар буолуохтара.
Чопчулаан эттэххэ, СӨ национальнай уус-уран мусуойун Намнааҕы филиалыгар 600 хартыына баар. Декоративнай-прикладной оҥоһуктар анал уоттаах витриналарга хараллыбыттар. Истиэнэҕэ проектордаах экран ыйаммыт. П.И.Сивцев аатынан кыраайы үөрэтэр түмэл экспонаттара 4 сааланан көрдөрүүгэ турбуттар. Манна 7 экспозиция уонна туспа быыстапка саалата баар. Хас биирдии экспозицияҕа ураты дизайннаах витриналар оҥоһуллубуттар.
Экспозиция барыта турдаҕына, үлэ куйаар ситимин нөҥүө барыа диэн үлэһиттэр кэпсииллэр. Оччоҕо ким баҕарар аан дойду хайа баҕарар муннугуттан киирэн, түмэл туһунан толору информацияны ылар буолуоҕа.
Эбийиэк бастакы сыбаайата 2020 с. Өрөспүүбүлүкэ күнүгэр түспүтэ. Ол эмиэ ураты суолталаах буолбута, тоҕо диэтэххэ, ол иннинэ Ил Дархан Айсен Николаев Нам улууһун нэһилиэнньэтин кытары көрсүһэригэр оройуоҥҥа култуура суолталаах саҥа эбийиэк наадатын туһунан этии киллэрбиттэрэ. Икки сыл тутуллан, эбийиэк оруобуна былааннаммытын курдук, САССР төрүттэммитэ 100 сылыгар уонна Максим Аммосов үбүлүөйүгэр олоххо киирдэ.

Салгыы видео-устууну көрүҥ.