Намныыр суолга сүппүт киһини көрдөөһүн салҕанар

Бүгүн, атырдьах ыйын 1 күнүгэр, Дьокуускай куорат Намныыр суолугар сүппүт киһини көрдөөһүн салҕанар.

От ыйын 30 күнүгэр 59 саастаах эр киһи Намныыр суолга тэллэйдии барбыт уонна 39-40 км икки ардыгар сүтэн хаалбыт. Сүппүт киһи доруобуйатыгар хааччахтаах эбит. Ол күн СӨ Быыһыыр сулууспатын үс быыһааччыта көрдөөбүттэр да, булбатахтар. Көрдөөһүн тохтоло суох, күннэри-түүннэри ыытыллар диэн СӨ Быыһыыр сулууспата иһитиннэрэр.

– От ыйын 30 күнүгэр суһал биригээдэ тиийэн, көрдөөһүн үлэтин хаамыытын былааннаан баран, 10.00 ч. көрдөөн барбыппыт, — диэн кэпсээтэ дьуһуурунай симиэнэ ыстаарсайа Роман Радионцев. – Икки квадроцикл, ону таһынан сатыы дьон, БПЛА  көмөтүнэн көрдөөтүлэр. Киэҥ сири кэрийэн көрдүбүт, кыра хаалла, онон сүппүт киһини булар кыах үрдээтэ. 9 быыһааччы уонна 4 волонтер үлэлээтэ.

Бүгүн көрдөөһүҥҥэ СӨ Быыһыыр сулууспатын 12 быыһааччыта көрдүү бардылар. Көрдөөһүнү 1 кылаастаах быыһааччыта Валерий Андросов салайар.

Ойуурга сүтэр дьон элбээтэ, үгүс түбэлтэҕэ арыгы иһэн баран сүтэллэр, онон сэрэхтээх буолуҥ, диэн СӨ Быыһыыр сулууспата сэрэтэр

Ону таһынан деменциялаах, доруобуйаларыгар кыһалҕалаах, уйулҕалара туруга суох кырдьаҕас дьон сүтэр түбэлтэтэ элбээтитин этэллэр. Онон чугас дьоҥҥутун кэтии-маныы сылдьыҥ, соҕотохтуу ойуурга ыытымаҥ, бэйэҕитин уонна чугас дьоҥҥутун харыстааҥ