Намтан «Дыгын оонньууларыгар» кыттааччылары биир дойдулаахтара үбүнэн өйөөтүлэр

Быйылгы «Дыгын оонньууларыгар» Нам улууһуттан Вячеслав Дьяконов уонна Артем Варданян кыттыыны ылаары бэлэмнэнэллэр.

Уолаттар билигин дьарыктана, күүскэ бэлэмнэнэ сылдьаллар. Маннык улахан тэрээһин элбэх үбү-харчыны эрэйэр. Ону өйдөөн улуус тутуу тэрилтэлэрин салайааччылара, үлэһиттэрэ биир сүбэнэн  үбүнэн өйөөн,  көмө оҥорорго сананнылар.

«Нам улууһа» МТ дьаһалтатын  пресс-сулууспата иһитиннэрбитинэн, улуустааҕы хапытаалынай  тутуу уонна архитектура управлениетын  салайааччыта Петр Эверстов, «Лигран» ХЭТ генеральнай дириэктэрэ Григорий Кобяков, «ИП Марков В.Р.» салайааччыта Виталий Марков, «Восток-Капитал» ХЭТ генеральнай дириэктэрин солбуйааччы Георгий Алексеев, «Перспектива» ХЭТ генеральнай дириэктэрэ Ньургун Спиридонов, «Фордевинд» ХЭТ генеральнай дириэктэрэ Владимир Горохов биир дойдулаах уолаттарын өйөөн, уу харчынан кыттыһан көмөлөстүлэр.

Бу курдук бэйэ-бэйэни өйөһөн,  күүс-көмө буоллахха, ыраах да чугаһыыр, ыарахан да чэпчиир.  Нам улууһун спортсменнара кинилэри өйүүр дьонноох буоланнар, ситиһиилэрэ сүҥкэн буоллаҕа.