«NAN» үүт бороһуоктара бобулуннулар – кутталлаах токсин көһүннэ

Туһанааччылар бырааптарын көмүскээһин уонна киһи доруобуйатын хонтуруоллуур федеральнай сулууспа (Роспотребнадзор) «Нестле Россия» ХЭТ биэрбит иһитиннэриитигэр олоҕуран, Арассыыйаҕа NAN 1 OPTIPRO, NAN 2 OPTIPRO, NAN Supreme, NAN EXPERPRO, NAN безлактозный, PreNAN, Nestogen Комфорт, Алфаре Амино атыы-эргиэн мааркаларынан тахсар түргэнник суураллар, лактозата суох кураанах бороһуоктары уонна эмтэнэр-диетическэй аһылыкка аналлаах аминокислоталаах кураанах  бороһуоктары киллэрэри тохтоторго быстах кэмнээх санитарнай миэрэни киллэрдэ.

Бу миэрэ 2025 сыл муус устар 15 күнүттэн сэтинньи 27 күнүгэр диэри оҥоһуллубут бородууксуйаҕа сыһыаннаах. Дьаһал цереулид диэн токсин баар буолуон сөбүнэн сибээстээн ылылынна.

Токсин тас дойдулартан киллэриллэр мас арыытыгар көстүбүт. Оҕо цереулид токсинынан сүһүрбүтэ 6 чаас иһинэн хотуолааһын эбэтэр сыптарыйыы курдук сибикилэринэн биллиэхтэрин сөп. Бу сибикилэр аһынан сүһүрүү уонна ынах үүтүн белоктарыгар аллергияҕа майгынныыллар.

Ыйыллыбыт бородууксуйа Арассыыйаҕа идентификация бэлиэлэринэн булгуччулаах бэлиэтэниигэ киирэр табаардар испииһэктэригэр киирбэт. Бородууксуйа Арассыыйа Федерациятын сиригэр-уотугар эргиирэ бобулунна. Бородууксуйаны төнүннэрии бэрээдэгин туһунан бары наадалаах информация оҥорон таһаарааччы саайтыгар баар.