Улахан кээмэйинэн наркотигы атыылаабыт дьиэ кэргэни сууттаатылар

Улахан кээмэйинэн наркотигы сокуоннайа суох эргиниигэ буруйдаахтарынан билиниллибит биир дьиэ кэргэн үс чилиэнигэр сыһыаннаах суут бириигэбэрэ сокуоннай күүһүгэр киирдэ, диэн СӨ УФСБ пресс-сулууспата иһитиннэрэр.

УФСБ үлэһиттэрэ быһаарбыттарынан, Челябинскай уобаластан төрүттээх дьахтар Нерюнгри оройуонугар наркотигы атыылыырынан дьарыктанар эбит. Буруйу оҥорбут дьахтар сокуону кэһэр дьайыытыгар төрөппүт кыыһын уонна күтүөтүн кытыннарбыт.

Суһал трээһиннэри ыытыы түмүгэр наркотигы атыылыыр ханаалы тэрийээччи кыыһа уонна күтүөтэ Нерюнгрига тутуллубуттар, кинилэртэн 500-чэ доза кэриҥэ а-пирролидиновалерофенон диэн наркотик, ону таһынан наркотигы оҥорууга аналлаах тэриллэр былдьаммыттар.

Кыыс ийэтэ аймахтара ыар буруйу оҥорууга буруйдаммыттарын истэн, бас билиитигэр баар хамсаабат баайын-дуолун атыылаан, киирбит харчытыгар көмүскээччинэн албакааты наймылаһар сыаллаах Нерюнгрига кэлбит. Кэлээтин кытта кинини эрэгийиэннээҕи УФСБ үлэһиттэрэ туппуттар.

ИДьМ силиэдэбэтэллэрэ хомуйбут дакаастабыллара наркотигы сокуоннайа суох оҥоруу, атыылааһын уонна тарҕатыы иһин буруйдуур бириигэбэри таһаарарга сөптөөх төрүөт буолбуттар. Суут, судаарыстыбаннай буруйдааччы этиитин учуоттаан, тэрийээччини 9 сылга уопсай эрэсиимнээх көннөрөр холуонньаҕа көҥүлүн быһарга , кыыһын — 8 сылга уопсай эрэсиимнээх холуонньаҕа, оттон күтүөтүн — 13 сылга кытаанах эрэсиимнээх холуонньаҕа хаайарга уураах таһаарда.