Наркотигынан эргинэ сатаабыт эдэр дьон тутулуннулар

Дьокуускайга  полицейскайдар 36 устуука дьоҕус бакыакка сууламмыт гашиштаах  наркокурьердары туттулар. Бу туһунан ИДьМ пресс-сулууспата иһитиннэрдэ.

«Чистое поколение» эпэрээссийэ иитинэн, СӨ ИДьМ наркотигынан эргиниини хонтуруоллааһын  управлениетын 1-кы отделын үлэһиттэрэ  ДПС иниспиэктэрдэрин кытта, Росгвардия байыастарын өйөбүлүнэн,  гашиш улахан баартыйатын батара сатаабыт  Томпо улууһуттан төрүттээх  21 уонна  26 саастаах уорбаланааччылары  туттулар.

Ол курдук хара санаалаах дьон, ол иһигэр  үрдүк үөрэх кыһатын 1 кууруһун устудьуона Дьокуускай куоракка Федор Попов уулуссатыгар баар биир дьиэҕэ кистэлэҥ сири оҥоро сылдьар кэмнэригэр тутулуннулар.

Бэрэбиэркэ кэмигэр эдэр дьон тас таҥастарын сиэптэриттэн  хараҥа өҥнөөх   26 сууламмыт бэссэстибэлээх эбиттэр. Салгыы суһал-ирдиир үлэ кэмигэр  полицейскайдар олорор дьиэлэр анныларыгар кистэлэҥ сирдэр координаталарын быһаарбыттар. Онно наркокурьердар былаастык бытыылка хаппахтарыгар  10 устуука бэссэстибэни кистээбиттэр.

Аны биир уорбаланааччы кыбартыыратын  көрүү кэмигэр,  наркотикка маарынныыр  биир сууламмыт бэссэстибэни,  ювелирный ыйааһыны,   изолентаны, бэрчээккини уонна да атын табахтааһыҥҥа туттуллар малы булбуттар.

Чинчийии түмүгэр биллибитэ, эдэр дьонтон ылыллыбыт бэссэстибэ гашиш эбит. Уопсайа ыйааһына — 40 грамм.

Эдэр дьон куйаар ситимин наркотигы атыылыыр былаһаакка   курьер-закладчиктара буолалларын билиммиттэр. Гашиһы ыйыллыбыт кистэлэҥ сиртэн ыланнар, кимэ биллибэт куратор ыйыытынан  үлэлээбиттэр.

Билигин эдэр дьоҥҥо РФ Холуобунай кодексын  30 ыст. 3 ч., 228.1 ыст. 4 ч. «а», «г»  п. холуобунай дьыала көбүтүлүннэ.