Настя Диодорова туһунан киинэ сотору тахсыаҕа

Муус устар 17 күнүттэн «Диодорова. Против течения» диэн киинэ киэҥ экрааҥҥа тахсыаҕа. Киинэ паралимпийскай оонньуулар призердара, аан дойду, Европа чөмпүйүөҥкэтэ, Арассыыйа успуордун үтүөлээх маастара Анастасия Диодорова туһунан буолар. Киинэ режиссера — Сандал Баишев. 

Сүрүн дьоруойу таларга 60-ча кыыс сайаапка биэрбит. Кинилэртэн Дьокуускай куорат 17-с №-дээх оскуолатын 7-с кылааһын үөрэнээччитэ Маша Иванованы талбыттар.

Оттон тириэньэр Наталья Степанова оруолугар Арассыыйаҕа биллэр артыыска Татьяна Арнтгольц кэлэн, уһуллубута. Кини сценарийы ааҕан баран, тута сөбүлэспит. Оттон кыыс төрөппүттэрин талааннаах артыыстар Ирина Никифорова, Федот Львов оонньууллар.

Киинэни Дьокуускайга, Москваҕа, Еланкаҕа, Мэҥэ Хаҥалас Тумулугар, сайылыкка устубуттар. Устар бөлөххө 30-ча киһи үлэлээбит. Саамай уустуга диэн, уу анныгар устуу буолбут.

«Диодорова. Против течения» киинэни Арассыыйа үрдүнэн көрдөрүүгэ таһаарарга былаанныыллар. Билигин улахан куораттарга көрдөрөр курдук кэпсэтиини ыыта сылдьаллар. Режиссер этэринэн, бэстибээллэргэ кыттыы сүрүн сыал буолбатах, ол эрээри, этии киирдэҕинэ, аккаастаныахтара суоҕа.

Успуорт драмата  көрөөччүгэ интэриэһинэй буолара күүтүллэр — кыракый кыысчаан туруулаһыыта, чыпчаалга дьулуһуута, уустук дьылҕата, дьиэ кэргэнин өйөбүлэ, бэйэ-бэйэҕэ истиҥ сыһыан күүһэ, ыарахаттары хайдах туоруура… Маны барытын бу киинэҕэ кэлэн, көрүөххүт.