Наталия Парфенова: «Төрөөбүт тылбытын үрдүктүк тутуоҕуҥ»

Саха тылын, литэрэтиирэтин, төрүт култуура учууталларын өрөспүүбүлүкэтээҕи үһүс сийиэһин дэлэгээттэрэ бүгүн Былатыан Ойуунускай аатынан саха тыйаатырыгар муһуннулар.

Далааһыннаах тэрээһиҥҥэ Горнай улууһуттан саха тылын уонна алын сүһүөх кылаас учууталлара, уһуйаан иитээччилэрэ, улуустааҕы үөрэх управлениетын исписэлииһэ, уопсайа 16 буолан кэллилэр.

Бэрдьигэстээххэ В.В.Филиппов аатынан улуустааҕы гимназия саха тылыгар, литературатыгар учуутала Наталия Петровна Парфенова санаатын үллэһиннэ:

—Сахам тылын кэнчээри ыччакка үөрэппитим быйыл 40 сыл буолла. Бу сийиэскэ долгуйа кэтэспит боппуруостарбыт көрүлүннүлэр, онон сүргэбит көтөҕүлүннэ. Быһа түһэн эттэххэ, сийиэс үлэтигэр көрүллэр боппуруостар сөптөөхтүк таҥыллыбыттар диэн бэлиэтиэхпин баҕарабын. Ол тэрээһин саҕаланыаҕыттан тута көһүннэ. Онон этиилэр, ырытыһыы, дьүүллэһии, санаа үллэстиитин кэнниттэн, сөптөөх быһаарыылар ылыллалларыгар эрэнэбит. Холобур, бүгүн саха тылын учуобунньуктарын саҥардан таһаарыы, саха тылын учууталларын статуһун үрдэтии, чаастарын эбэн биэрии туһунан олус наадалаах уонна тыҥаан турар боппуруостар көрүлүннүлэр. Түмүктээн эттэхпинэ, хас биирдиибит төрөөбүт тылбытын харыстыаҕыҥ, кэнчээри ыччакка иҥэриэҕиҥ, төрөөбүт тылбытын үрдүктүк тутуоҕуҥ.