Наталья Кашперская Кирилл Бычков кандидатуратын туһунан

Бүгүн Саха сирин баһылыга Ил Түмэҥҥэ Кирилл Бычков кандидатуратын өрөспүүбүлүкэ бырабыыталыстыбатын бэрэссэдээтэлин дуоһунаһыгар киллэрдэ. Саха сирин уонна РФ уопсастыбаннай палаататын чилиэнэ Наталья Кашперская бу быһаарыы туһунан санаатын үллэһиннэ.

«Кирилл Бычкову Саха сирин бырабыыталыстыбатын бэрэссэдээтэлин солотугар көрөллөрө саамай сөптөөх. Уопуттаах киһи. Кини бырабыыталыстыба бэрэссэдээтэлин солбуйааччынан уһуннук үлэлээтэ уонна тутуу, урбаан, экэниэмикэ, сыыппара сайдыытын курдук салаалары сүрүннээбитэ», — диэн Кашперская кэпсээтэ.

Кини бу хайысхаларынан барытыгар Бычков салалтатынан эрэгийиэн өрө таҕыста диэн бэлиэтиир.

«Бу Кирилл Евгеньевич үчүгэй салайааччы уонна толкуйдаах экэнэмиис буоларын туоһулуур. Билигин аан дойдутааҕы бигэ туруга суох кэмҥэ өрөспүүбүлүкэ баһылыга эрэгийиэни тирэхтээх сайдыы суолунан сирдиир. Ол иһин киниэхэ үчүгэй түмсүүлээх хамаанда наада. Онно маннык аныгылыы көрүүлээх, креативнай менеджер, көдьүүстээх салайааччы Кирилл Бычков үчүгэй көмөлөһөөччүнэн буолуоҕа», — диэтэ кини.

Виктория Сергеева, СИА.

Женни Стрюкова тылбааһа