Наталья Петрова: «Уолаттарбыт кыайыы аргыстаах этэҥҥэ эргиллэн кэллиннэр!»

Ньурба улууһун баһылыгын солбуйааччы Наталья Петрова: «Инники кирбиигэ сылдьар уолаттарбыт кыайыы аргыстаах этэҥҥэ эргиллэн кэллиннэр!» — диэн санаатын этэр:

— Быстах хомуур саҕаланыаҕыттан дьоммутугар тугунан, хайдах көмөлөһөргө сыал-сорук турбута, тута анал штаб тэриллибитэ. Таҥас-сап, туттар мал-сал ылалларыгар хас биирдиилэригэр 80-нуу тыһ. солк. биир кэмнээх көмө олохтоммута. Манна улуус резервнэй фондатыттан 11 360 тыһ. солк. көрүллүбүтэ, ол иһигэр өрөспүүбүлүкэ атын военкоматтарыттан ыҥырыллыбыт биир дойдулаахтарбытыгар уонна контрактниктарга эмиэ. Быстах хомуурга хабыллыбыт дьоммут дьиэ кэргэттэригэр матырыйаалынай өйөбүл олохтоммута. Байыаннай эпэрээссийэҕэ уопсайа 100-тэн тахса биир дойдулаахтарбыт кытта сылдьаллар.

Итини таһынан байыаннай эпэрээссийэҕэ кыттар дьоммут дьиэ кэргэттэригэр кэккэ чэпчэтиилэри олохтонон, кинилэр улуус иһинэн Ньурбатааҕы АТП оптуобустарыгар, култуура тэрилтэлэригэр (киинэ тыйаатырыгар, тыйаатырга, түмэлгэ) босхо сылдьаллар, хамсык дьаҥын анаалыһын босхо туттараллар, үлэҕэ саҥа киириигэ мэдиссиинискэй хамыыһыйаны босхо ааһаллар. Улуус дьаһалтатыттан саллааттар дьиэ кэргэттэригэр кураатардар анаммыттара. Нэһилиэктэр баһылыктара эмиэ дьиэ кэргэттэри кытта ыкса ситимнээхтик үлэлииллэр. Улууска волонтерскай куорпус үлэтин ыччат бэлиитикэтин управлениета сүрүннүүр. Номнуо 600-тэн тахса сайаапка толорулунна. Ыччаттар уонна тэрилтэлэр үлэһиттэрэ хотон сыбаҕыттан саҕалаан мас-муус бэлэмнээһинигэр тиийэ үлэлээбиттэрэ. Тэрилтэлэр эмиэ көмөнү оҥорууга көхтөөх сыһыаннарынан холобур буолаллар.

Иистэнэр ийэлэр Галина Федорова салалтатынан уопсайа 3500 кэриҥэ араас таҥас-сап тигэн, байыаннай дьайыыга кытта сылдьар уолаттарга анаан ыыппыттара. Бу курдук олунньу саҥатыгар улуус баһылыга Алексей Иннокентьев Ньурбаттан хомуллубут гуманитарнай көмөнү Украинаҕа байыаннай дьайыыга кытта сылдьар биир дойдулаахтарбытыгар илдьэн туттарда. Нобуорга наһыылка, олбох, ис таҥас, балаклава, кээнчэ, куллуку, бэлиэ, ууну курдарбат плащ, флис сэлиэчик, наколенник, стелька уонна анал сакааһынан автомат уоһугар кыра хах оҥорон угуллубута. Маны тэҥэ хас биирдии саллаакка оҕолор суруктарын кытары харысхал баар.

Улуус олохтоохторо, урбаанньыттар, тэриллиилээх хаһаайыстыбалар көхтөөхтүк көмөлөһөллөр. Байыаннай эпэрээссийэҕэ кытта сылдьар дьоммутугар уонна кинилэр дьиэ кэргэттэригэр улуустааҕы көмө фондатыгар үп киирэ турар. Маны сэргэ байыаннай сулууспалаахтарга, кинилэр дьиэ кэргэттэригэр уйулҕа туруктаах буолуутугар туһуламмыт өйөбүл, көмө үлэтэ барар. Онон көмө араас өттүттэн хабан ыытыллар. Өй-санаа, уйулҕа бигэ уонна чөл туруктаах буоллаҕына, дьон доруобуйалара, олохторо-дьаһахтара көнөр суолга киирэрэ, тупсар өттүгэр барара саарбахтаммат.