Наушник уорбут эдэр киһи икки сылга көҥүлэ быһыллыан сөп

Дьокуускайдааҕы полиция 2-с №-дээх отделын дьуһуурунай чааһыгар көмпүүтэрдиир кулууп бэрэстэбиитэлэ наушник уоруллубутун туһунан иһитиннэрбит. Бу туһунан СӨ ИДьМ пресс-сулууспата суруйар.

Холуобунай ирдэбил үлэһиттэрэ Мэҥэ Хаҥалас улууһуттан төрүттээх 26 саастаах киһи уорбаланарын быһаарбыттар.

Быһаарыллыбытынан, бу киһи Дьокуускайга баар көмпүүтэрдиир кулуупка кэлэн, ким да көрбөтүгэр блоктан наушнигы тардан ылан, суумкатыгар кистээбит уонна барбыт.

Уоруунан холуобунай дьыала тэрилиннэ. Эдэр киһи икки сылга тиийэ көҥүлэ быһыллыан сөп.