Нөөрүктээйи оскуолата саҥа үөрэх дьылыгар бэлэм

Уһулуччулаах учуутал Василий Оконешников аатынан Павловскай орто оскуолата саҥа үөрэх дьылыгар аанын тэлэччи аһарга бэлэм.

Бу туһунан Мэҥэ Хаҥалас улууһун дьаһалтатын пресс-сулууспата иһитиннэррэ.

Быйыл, балаҕан ыйын 1 күнүттэн, үөрэх кыһатыгар 515 үөрэнээччи билиини сомсо кэлиэхтэрэ, олор истэригэр 32 выпускник уонна 55 оскуола боруогун аан маҥнайгытын атыллаан бастакы кылааска киирэр үөрэнээччилэр.

Атырдьах ыйын 23 күнүттэн, номнуо 55 кырачаан үс кылааһынан арахсан оскуоланы, учууталларын кытта билсэр сыаллаах, бэлэмнэнии дьарыктарын саҕалаабыттара. Оскуола дириэктэрэ Валерий Петров Арассыыйаҕа Уһуйааччы уонна Аҕа сүбэһит сылынан биир идэлээхтэригэр ситиһиилээх үөрэх дьылын баҕарда.