Нөөрүктээйигэ өрөспүүбүлүкэтээҕи хайыһар күрэҕэ үрдүк таһымнаахтык ааста

Мэҥэ Хаҥалас улууһун Нөөрүктээйи нэһилиэгэр хайыһарынан сүүрүүгэ Саха Өрөспүүбүлүкэтин Куубагын бэһис түһүмэҕэ ыытылынна.

Тэрээһин ССРС физическэй култууратын уонна успуордун туйгуна, РСФСР успуордун бэтэрээнэ, СӨ хайыһарга федерациятын бочуоттаах бэрэссэдээтэлэ, «ХХ үйэ успуордун лауреата», ССРС успуордун маастарыгар хандьыдаат, РСФСР бастыыр иһин күрэҕин призера, хайыһар, биатлон, спортивнай ориентирование күрэхтэригэр өрөспүүбүлүкэ хас да төгүллээх чөмпүйүөнэ Дмитрий Семенович Тимофеев аатын үйэтитиигэ ананан ыытылынна. Күрэхтэһиигэ Хатастан, Дьокуускай, Мииринэй куораттарыттан, Алдан, Нерюнгри оройуоннарыттан, Бүлүү, Горнай, Нам, Хаҥалас, Чурапчы, Уус Алдан, Амма, Уус Маайа улуустарыттан, Иркутскай уобалаһыттан тиийэ кэлэннэр, уопсайа 148 спортсмен кыттынна.

Тэрээһин аһыллыытыгар Мэҥэ Хаҥалас улууһун баһылыгын бастакы солбуйааччы Василий Михайлов, Ил Түмэн дьокутаата, улуустааҕы хайыһар федерациятын бэрэссэдээтэлэ Андрей Находкин, успуорт уонна физическэй култуура салалтатын салайааччытын солбуйааччы Иннокентий Баишев, Дмитрий Семенович кэргэнэ Зоя Тимофеева күрэх кыттааччыларын кытары көрүстүлэр, ситиһиини баҕардылар.

Оҕолорго, дьахталларга, эр дьоҥҥо, бэтэрээннэргэ диэн саастарынан араартаан, 1000 миэтэрэттэн 10 килэмиэтиргэ тиийэ уһуну сүүрүүгэ уон биэс старт биллэрилиннэ. Тыҥааһыннаах күрэх түмүгүнэн: 2014 сыллаах төрүөх уолаттарга уонна онтон кыра саастаахтарга I м – Дархан Тимофеев (Горнай), II м – Юрий Попов (Мэҥэ Хаҥалас), III м – Арсен Шишигин (Амма), 2014 сыллаах төрүөх кыргыттарга уонна онтон кыра саастаахтарга: I м – Лилиана Гаврильева (Нам), II м – Лилиана Винокурова (Дьокуускай), III м – Диана Осипова (Дьокуускай). 2012-13 сыллаах төрүөх уолаттарга: I м – Вадим Огушаев (Мэҥэ Хаҥалас), II м – Эдгар Павлов (Хатас), III м – Виктор Толкачев (Дьокуускай). 2012-13 сыллаах төрүөх кыргыттарга: I м – Милана Бодрова (Хаҥалас), II м – Снежана Тотонова (Дьокуускай), III м – Виктория Стручкова (Нам). 2010-11 сыллаах төрүөх уолаттарга: I м – Сандаар Поротов (Хатас), II м – Андрей Миронов (Дьокуускай), III м – Дамир Тоноев (Дьокуускай). 2010-11 сыллаах төрүөх кыргыттарга: I м – Ульяна Савченко (Нерюнгри), II м – Елена Кононова (Нерюнгри), III м – Алина Терентьева (Мэҥэ Хаҥалас). 2008-09 сыллаах төрүөх уолаттарга: I м – Илья Федоров (Бүлүү), II м – Никита Меронов (Уус Майа), III м – Сайдам Поротов (Хатас). 2008-09 сыллаах төрүөх кыргыттарга: I м – Софья Золотухина (Нерюнгри), II м – Ксения Янополец (Чульман), III м – Ксения Яндреева (Ньурба). 2006-07 сыллаах төрүөх уолаттарга: I м – Айтал Терешкин (Дьокуускай), II м – Николай Копырин (Уус Алдан), III м – Даниэль Окороков (Дьокуускай). 2006-07 сыллаах төрүөх кыргыттарга: I м – Полина Клячина (Мииринэй), II м – Айыы-куо Михайлова (Дьокуускай), III м – Валерия Кривогорницына (Мэҥэ Хаҥалас).

1985-2005 сыллаах төрүөх эр дьоҥҥо: I м – Николай Зыков (Мэҥэ Хаҥалас), II м – Никита Шестаков (Амма), III м – Дмитрий Егоров (Дьокуускай). 1985-2005 сыллаах төрүөх дьахталларга: I м – Евгения Сергеева (Дьокуускай), II м – Софья Левина (Дьокуускай), III м – Ирина Иванова (Мэҥэ Хаҥалас). 1965-84 сыллаах төрүөх бэтэрээн эр дьоҥҥо: I м – Игорь Петров (Амма), II м– Яков Попов (Мэҥэ Хаҥалас), III м– Гаврил Григорьев (Чурапчы). Оттон 1964 сыллаах төрүөх уонна онтон аҕа саастаах бэтэрээн эр дьоҥҥо: I м –Эдуард Петров (Мэҥэ Хаҥалас), II м – Александр Новгородов (Нам), III м – Мирослав Дьячковский (Иркутскай уобалас). 1963 сыллаах төрүөх уонна онтон аҕа саастаах бэтэрээн дьахталларга: I м – Клара Винокурова (СК Чысхаан), II м – Кристина Билюкина (СК Чысхаан) буоллулар.

Өрөспүүбүлүкэ таһымнаах күрэхтэһиини хайыһарынан сүүрүүгэ СӨ федерацията, Мэҥэ Хаҥалас улууһун дьаһалтата, Алданнааҕы олимпийскай эрэллэр спортивнай оскуолалара, Нөөрүктээйи нэһилиэгин дьаһалтата, Дмитрий Семенович чугас аймах-билэ дьоно тэрийэн ыыттылар, кыайыылаахтары сыаналаах бириистэринэн наҕараадалаатылар. Быһый атахтаахтартан бастыҥнара, сытыы тыаллыын сырсар, хайыһар ханыылаах спортсменнар Саха сирин спорт кыһыҥҥы көрүҥнэрин Спартакиадатын иннинэ ыытыллыбыт күрэххэ астына, дуоһуйа кытыннылар, бэйэлэрин тургутан көрдүлэр диэн Мэҥэ Хаҥалас улууһун дьаһалтатын пресс-сулууспата иһитиннэрэр.