Нэһилиэгин бүтүн Арассыыйаҕа ааттатта

Мэҥэ Хаҥалас улууһун Төҥүлү нэһилиэгин урбаанньыта Иван Иванович Борисов туһунан “Саха сирэ” хаһыат саайтын нөҥүө сырдатаары гынабыт.

Кини 1977 с. Төҥүлү орто оскуолатын ситиһиилээхтик бүтэрбитэ. Ол сыл СГУ инженернэй-тэхиньиичэскэй факультетын бүтэрэн, университекка научнай үлэнэн дьарыгын саҕалаан бүтэрбитин кэннэ, Красноярскайдааҕы мелиоративнай институт  Дьокуускайдааҕы филиалыгар киирэн научнай тиэмэнэн үлэлээн, хас да патент ылары ситиспитэ. Ол сылдьан дьонугар соҕотох уол буолан, дьонун көрө дойдутугар сопхуоска үлэлии тахсыбыта.

Борисовтар дьиэ кэргэн алта оҕону иитэн-такайан барыларын үлэһит дьон оҥортоон, дьиэлээн  билигин оҕолоро дьонноругар күүс-көмө буола тураллар.

Биһиги Уйбааммыт 2001 с. урбаан эйгэтигэр үлэлииргэ быһаарынан, үлэтин “Уют” диэн кафе аһан саҕалыыр. Төһө да ыарахаттары көрүстэр соҕуруунан-хотунан сылдьан нэһилиэк туохха наадыйар табаарын аҕалан “Сатал” диэн ырыынак аспыта. Билигин биһиги Уйбааммыт  “Хотун Төҥүлү” тэрилтэтигэр  элбэх киһини үлэлээн-хамнастаан олорор. Үлэһиттэригэр сүрдээх болҕомтолоохтук сыһыаннаһар.

Кэлин Тумул нэһилиэгэр “Нал”  диэн кафены аспыта. Онтуката уокка былдьаммыта. Ону элбэх айанньыт тохтоон  ааһар сирдэрин аҕыйах ыйынан чөлүгэр түһэрэн, үлэлии-хамныы сылдьаллар. Бу кафетыгар урукку туттулла сылдьыбыт маллары-саллары, кыыллары, көтөрдөрү уо. д.а. ис-тас көстүүтүн бэйэтин бырайыагынан барытын чөлүгэр түһэрэн,  саҥардан оҥордо. Нэһилиэк ортотугар улахан сахалыы балаҕан туттаран, онно араас тэрээһиннэри ыытар. Сотору кэминэн “Сатал” ырыынагар саҥа дьиэ тутан киллэрээри сылдьар.

Иван Иванович сүрдээх элбэх былааннардаах. Онтукатын куруук тиһэҕэр тиэрдэр. Ол курдук “Уют” кафетын таһыгар “Дэгэт аартык” диэн өрөспүүбүлүкэ араас муннуктарыттан тимир, мас уустарыгар куонкурус биллэрэн, барытын бэйэтэ уйунан,   араас тиэмэҕэ скульптура оҥорторбута. Бу искибиэр Төҥүлү нэһилиэгин остуоруйатын кэпсиир ис хоһоонноох.

Бу  “Дэгэт аартык” искибиэр Төҥүлү нэһилиэгин аатыттан уонна ыаллыы олорор нэһилиэктэртэн “Алсиб” , “Победа” искибиэрдэрэ Бүтүн Арассыыйатааҕы “Бастыҥ муниципальнай практика -2025” куонкуруска кыттан, үһүс бочуоттаах миэстэни ылан, Москва куоракка баран наҕараадаланан кэллилэр. Бу үлэлэр элбэх үлэттэн, сыраттан, толкуйтан тахсыбыт үлэ үрдүктүк сыаналаммытынан биһиги астынабыт.

Маны барытын үөһээҥҥи салалта көрөн олорор. Ол да иһин, биһиги Иван Ивановичпытын үлэтин сыаналаан, Арассыыйа бастыҥ урбаанньыттарын “Мэҥэ Аат” Бочуотун кинигэтигэр киллэрбиттэрэ.

Ити курдук, биһиги оскуолаҕа бииргэ үөрэммит үөлээннээхпитигэр үлэтигэр өссө да үрдүк ситиһиилэри, толкуйдаабыта, туппута, ылсыбыта барыта туолан истин.

Төҥүлү оскуолатын 1977 с. 10″А» кылааһыгар бииргэ үөрэммит доҕотторун ааттарыттан суруйда Вера Владимирова