Нэһилиэк баһылыгар саба түспүт уонна полиция отделыгар айдаарбыт эр киһи сууттанна

СӨ Үрдүкү суута Уус Алдан оройуонун суутун бириигэбэрин күүһүгэр хаалларда. Бу бириигэбэринэн Саха сирин олохтооҕо хас да буруйу оҥорууга, ол иһигэр нэһилиэк баһылыгар саба түһүүгэ, полиция үлэһиттэригэр күүһү туһаныыга уонна ИДьМ оройуоннааҕы отделын баайын-дуолун соруйан алдьатыыга буруйдааҕынан билиниллибитэ.

Быһылаан бу сыл муус устар 1 күнүгэр буолбут. Бу күн арыгы иһэн баран, итирик туруктаах эр киһи нэһилиэк баһылыгын үлэтиттэн астымматын биллэрэн, сыҥаахха уонна хаста да көхсүгэ охсубут, онон чэпчэки эчэйиини оҥорбут. Онтон кэлин Таатта улууһунааҕы ИДьМ отделыгар, өссө да итирик туруктаах сылдьан, полиция үлэһиттэригэр утарсыбыт. Кини оперативнай дьуһуурунайга күүһүн туһаммыт.  Отдел учаастагар араас малы-салы алдьаппыт. ИДьМ оройуоннааҕы отделыгар оҥоһуллубут хоромньу 532 820 солкуобайга тэҥнэспит.

Суут кэмигэр эр киһи буруйун толору билиммит уонна дьыаланы ураты бэрээдэгинэн көрөллөрүгэр көрдөспүт. Уус Алдан оройуонун суута эр киһини РФ ХК 318-с ыст. 1-кы чааһынан (былаас бэрэстэбиитэлигэр күүһү туһаныы), 318-с ыст. 1-кы чааһынан (былаас бэрэстэбиитэлигэр күүһү туһаныы) уонна 167-с ыст. 2-с чааһынан (баайы-дуолу соруйан алдьатыы) буруйдааҕынан билиммит.

Буруйданааччы 4 сыл болдьохтоох 5 сылга усулуобунайдык көҥүлэ быһыллыбыт. Сууттаммыт киһи албакаата бириигэбэри  Үрдүкү суут көрүүтүгэр ыыппыт. Ол эрээри Үрдүкү суут дьыала матырыйаалларын көрөн баран, бастакы инстанциялаах суут быһаарыытын уларыппакка хаалларбыт.