Нэһилиэк баһылыгын боломуочуйата болдьоҕун иннинэ тохтотулунна

Чурапчы улууһун борокуратуурата «Соловьев нэһилиэгэ» муниципальнай тэриллии дьаһалтатыгар хоруупсуйаны утары охсуһуу сокуон тутуһуллуутун бэрэбиэркэлээтэ.

Бэрэбиэркэ түмүгүнэн, дьаһалтаҕа баһылык бииргэ төрөөбүт убайын кэргэнэ — экэнэмиис, оттон төрөөбүт сиэнэ – инструктор дуоһунастарыгар муниципальнай сулууспаҕа үлэҕэ ылыллыбыттара быһаарыллыбыт. Ол эрээри «Соловьев нэһилиэгэ» МТ баһылыга сокуон ирдэбилин кэһэн, интэриэстэр сатаспат буолууларын туһунан сөптөөх хамыыһыйаҕа иһитиннэрии ыыппатах. Онон сибээстээн улуус борокуратуурата Нэһилиэк дьокутааттарын Сэбиэтин бэрэссэдээтэлин аатыгар, баһылык итэҕэли сүтэрбитинэн сибээстээн, кини боломуочуйатын болдьоҕун иннинэ тохтотор туһунан быһаарыыны ылынарыгар этии киллэрбит.

Салгыы олохтоох салайыныы бэрэстэбиитэллээх уоргана сөптөөх быһаарыыны ылымматаҕын учуоттаан, улуус борокуратуурата «Соловьев нэһилиэгэ» МТ баһылыгын боломуочуйатын тохтотор туһунан суукка административнай ирдэбил сайабылыанньатын киллэрбит. Суут борокуруору этиитин кытта сөбүлэһэн, ирдэбил көрдөһүүтүн толорбут. Суут быһаарыыта сокуоннай күүһүгэр киирэ илик, диэн СӨ Борокуратууратын пресс-сулууспата суруйар.