Нэһилиэк баһылыктарыгар участковайдарга олорор дьиэнэн хааччыйыыга үлэни күүһүрдэргэ чопчуланна

Бүгүн, олунньу 28 күнүгэр Ил Түмэн сэттис ыҥырыылаах мунньаҕын бэһис мунньаҕар норуот дьокутааттара Ис Дьыала миниистирэ, полиция генерал-лейтенана Владимир Прокопенко ИДьМ уорганнарын 2023 сыллааҕы үлэлэрин туһунан отчуоту иһиттилэр.

Дакылаакка Саха сиригэр буруйу оҥоруу Уһук Илин эрэгийиэҥҥэ намыһах көрдөрүүлээҕэ бэлиэтэннэ. 2023 сыл түмүгүнэн Саха сиригэр буруйу оҥоруу регистрацияламмытынан 3%-нан түспүт, оттон Уһук Илин уокурукка – 1,0% , Арассыыйа үрдүнэн -4,7%.

Ордук намыһах буруйу оҥоруу Орто Халыма (300), Уус Алдан (390,9), Эбээн-Бытантай (400,0), Таатта (417,7), Абый (450,0), Кэбээйи (509,1), Амма (517,7) улуустарыгар бэлиэтэнэр. Оттон муҥутуур элбэх буруйу оҥоруу Аллайыаха (1750,0), Алдан (1707,5), Өймөкөөн (1550,0), Нерюнгри (1414,3), Ленскай (1303,0) улуустарынан уонна Дьокуускай куоракка (1690,8) тахсыбыт. Өрөспүүбүлүкэҕэ  сааһын ситэ илик оҕолор буруйу оҥоруулара 7,5% түспүт.

Саамай элбэх буруйу оҥоруу 9 улууска регистрацияламмыт, муҥутуур элбэх буруйданааччы Нерюнгри, Алдан уонна Уус Алдан улуустарынан бааллара быһаарыллыбыт. Итирик туруктаах сылдьан буруйданааччы ахсаана 11 улууска эбиллибит, ол курдук муҥутуур элбэх Нам, Уус-Алдан уонна Анаабыр улуустарынан регистрацияламмыт.

Суол быһылаана тахсыыта Саха сиригэр 9,5%, ону кытта эмсэҕэлээнээччи ахсаана 8,8% үрдээбит. Ол эрэн Саха сиригэр суол быһылаана тахсыыта дойду эрэгийиэннэрин ортолоругар намыһах көрдөрүүлээҕинэн ааҕыллар. Оттон куйаар ситимин туһанан түөкүннээһин өрөспүүбүлүкэ үрдүнэн 24,3%-нан эбиллибит, ону таһынан харчыга албыннааһын – 37,4%, ыраахтан олорон харчыны уоруу – 21,5%. Үксүн суотабай төлөппүөнтэн эрийэн, социальнай ситимҥэ сымыйа биллэрии таһааран дьону албынныыллар, өйдөрүн баайаллар.

Дьүүллэһии түмүгүнэн норуот дьокутааттара Ис Дьыала миниистирэ Владимир Прокопенко иһитиннэриитин биһирээтилэр уонна сибидиэнньэҕэ ыллылар. Ону таһынан салгыы үлэни күүһүрдэригэр, омук гражданнара буруйу оҥорууларын уонна сокуону кэһиилэрин арыйар үлэлэри көдьүүстэхтик ыытарыгар, Ис Дьыала уорганнарыгар каадырдары тардыы үлэҕэ болҕомтотун уурарыгар баҕардылар.

Маны таһынан нэһилиэк баһылыктарыгар полиция участковайдарыгар сулууспаны ааһар кэмнэригэр служебнай эбэтэр анал  олорор дьиэнэн, дьону приемнуурга аналлаах полиция учаастактааҕы пууннарыгар хоһунан эбэтэр үлэлиир кэбиниэтинэн хааччыйар кыаҕы көрүллэригэр этилиннэ. Ону сэргэ үлэлии турар  учаастактааҕы полиция хосторун толору хааччыйыыга, өрөмүөн үлэтин ыытарга көмө оҥороллоругар быһаарылынна. Инновация, сыыппара сайдыытын уонна инфокоммуникационнай технология миниистирэ  Василий Ефимовка нэһилиэнньэ ортотугар түөкүннээһин саҥа көрүҥнэрин, ньымаларын уонна схемаларын, суол сырыытыгар киһи олоҕор үөскүүр куттал сүрүн биричиинэлэрин уонна сэрэтии туһунан иһитиннэрии үлэтин тэрийэригэр, ону сэргэ үбүлээһин боппуруоһун көрөрүгэр сорудахтанна.