Нэһилиэк көхтөөх үлэһиттэрин бэлиэтээтилэр

Уус Алдан улууһугар Курбуһахха ааспыт сыл түмүгүн таһаардылар.

Тэрээһиҥҥэ нэһилиэк бастыҥ, көхтөөх үлэһиттэрин чиэстээтилэр, анал ааттар туттарылыннылар. «Сыл бастыҥ саҕалааччыта» анал ааты Дьокуускай куоракка олорор Николай Костромиҥҥа туттардылар. Николай Николаевич ааспыт сайын нэһилиэгэр аҕата Н.П.Костромин төрөөбүтэ 100 сылынан ыһыах тэрийэн ыыппытыгар махтаннылар. Аҕата Сэбирдэх Уус диэн аатынан дьоҥҥо-сэргэҕэ биллибит улахан уус киһи. Ону сэргэ, маннык номинацияҕа дойдуларыгар ытык бэлиэ оҥорбут, сымара тааһы уурбут Цойдар аймах тигистилэр. Цой диэн кэриэй киһитэ Курбуһахха, кэлин Бороҕоҥҥо олорбут. Кини ыччаттара эһэлэригэр Цой Дюн Хи- Сергейгэ уонна аҕаларыгар Цой Иван Сергеевичкэ-Чаҥ Джойга сүгүрүйэн, дьон-сэргэ көрөн ааһарыгар бэлиэ туруорбуттара болҕомтону тардыбыт. Кэнчээри ыччат өбүгэлэрин туһунан өйдүү-саныы сылдьарыгар анаммыта бэлиэтэннэ.

Полина Готовцева

Хаартыска ааптар тиксэриитэ