Хаартыска: ааптар тиксэриилэрэ
Таатта улууһун И.В. Николаев аатынан Харбалаахтааҕы норуот айымньытын дьиэтигэр Ийэ-тыл уонна сурук-бичик күнүнэн «Омук күүһэ — өйүгэр, өйүн күүһэ — тылыгар» диэн нэһилиэк тэрилтэлэрин икки ардыларыгар «Тыл оонньуута» күрэс буолан ааста.
Ол курдук, нэһилиэкпит тэрилтэлэриттэн 3 киһилээх хамаанда туруоран көхтөөх кыттыыны ыллылар: «Төлөн» АУо, Харбалаахтааҕы үөрэхтээһин холбоһуга, Харбалаахтааҕы балыыһа, баһаарынай чаас, оҕо ускуустубатын оскуолата уонна олохтоох дьаһалта күөн көрүстүлэр, билиилэрин тургуттулар. Быйыл бу оонньуу хаһыс да төгүлүн ситимин быспакка ыытыллар. Инники сылларга «ТОК» оонньууну саха тылын уонна литературатын учуутала Валентина Семеновна Кривошапкина салайыытынан тэриллэн ыытыллара.
Быйыл тэрээһини оскуолабыт саха тылын уонна литературатын учууталлара Трофимова Варвара Павловна, Седалищева Евдокия Ивановна, олохтоох бибилэтиэкэ сэбиэдиссэйэ Дианна Егоровна Соломонова уонна сынньалаҥ киин үлэһиттэрэ тэрийэн ыыттылар. Оонньуу 3 түһүмэҕинэн ыытылынна. Кылгастык эттэххэ, маҥнайгы түһүмэххэ: өс хоһооннор, тылы үөрэппит учуонайдар, Н.Е. Мординов-Амма Аччыгыйа, Д.К. Сивцев-Суорун Омоллоон, А.И. Софронов-Алампа, тыл суолтата уо.д.а уустук боппуруостарга хоруйдаатылар. Иккис-үһүс түһүмэхтэргэ тыл суолталарын быһаардылар. Холобур, үһүс түһүмэххэ хапытааннар хамаандаларыгар тутатына мүнүүтэҕэ ойууга суруллубут тыллары сахалыы быһаарар, холобур, “Тоҥсоҕой ” диэн тылы “Мас үөнүн сиир, олорон тоҥсуйар” диэн быһаарыахха сөп.
Бу курдук, төрөөбүт төрүт тылбытыгар аналлаах нэһилиэк тэрилтэлэрин икки ардыларыгар ыытыллыбыт «Тыл оонньуута» сүрдээх сэргэхтик ааста.
Оонньуу түмүгүн дьүүллүүр сүбэ билиһиннэрдэ, түмүк маннык буолла: үһүс миэстэни балыыһа МПЧ-2 «Аламай» хамаандата, иккис миэстэни «Төлөн» АУо хамаандата, бастакы миэстэни Харбалаахтааҕы үөрэхтээһин холбоһугун «Эрчим» хамаандата ыллылар. Кыттыбыт хамаандалар туоһу суруктарынан уонна Грамотанан наҕараадаланнылар.
Кыттааччылар бары үөрэ-көтө оонньоон, ийэ тылларын өссө билэн, билиилэрин хаҥатан тарҕастылар. Бары кыттааччыларга уонна тэрийээччилэргэ махтанабыт. Өссө да маннык сэргэх, киһи өйүн-санаатын сайыннарар, уһугуннарар уонна киһини толкуйдатар оонньуулар сылын аайы ыытылла турдуннар!
Варианна МАКАРОВА, Харбалаахтааҕы үөрэхтээһин холбоһугун дириэктэри иитэр үлэҕэ солбуйааччы
Бэҕэһээ, Ийэ тыл, сурук-бичик күнүгэр, Киллэм култууратын дьиэтин үлэһиттэрэ ураты эҕэрдэлэринэн дьону соһуттулар уонна үөртүлэр.…
Бүгүн Уһук Илин тоҕус эрэгийиэнин сүүмэрдэммит хамаандаларын художественнай гимнастикаҕа бастыыр иһин күрэхтэһиилэрин үһүс күнэ Саха…
Төрөөбүт тыл уонна сурук-бичик күнүнэн Таатта улууһун Дьохсоҕон нэһилиэгэр “Саргыланнын-кынаттаннын сахам тылын кэрэтэ-кэрэмэһэ!” диэн өрөспүүбүлүкэ…
Бырабыыталыстыбаҕа Бүлүү бөлөх улуустарга уоту туһаныы кээмэйин диапазоннарын (тарыыптарын) хаттаан көрбүттэр. Сунтаар уонна Ньурба улуустарыгар…
Бултуулларын сөбүлүүр дьоҥҥо, булчуттарга маннык бэртээхэй сүбэ баар. Бастатан, айылҕатын быһыытынан тыһы ыт ордук…
Бүлүү өрүс хаҥас кытылын гаастааһын улахан бырагырааматын олоххо киллэриигэ, 2026-2031 сс. Үөһээ Бүлүү улууһугар Харбалаҕа,…