Нэһилиэк урукку баһылыга тыраахтар, УАЗ массыына уонна мотуордаах оҥочо уорбут

Саха сиригэр биир нэһилиэк урукку баһылыгар муниципалитет баайын-дуолун сымыйанан учуоттан уһулан, бэйэтигэр иҥэриммитигэр бириигэбэр сокуоннай күүһүгэр киирдэ.

2020 сылтан 2021 сылга диэри муниципальнай тэриллии баһылыгынан үлэлии олорон, бу киһи дьаһалта балаансатыттан «Беларусь» тыраахтары, УАЗ массыынаны уонна мотуордаах оҥочону суох гыныллыбытын туһунан сымыйа дьаһаллары таһаарбыт. Кэлин кини тыраахтары уонна УАЗ массыынаны Гостехнадзорга, ГИБДД  эргэрбитинэн сылтаҕыран учуоттан уһултарбыт.  ГИМС оҥочо куорпуһун учуоттан уһуларга аккаастаабытын үрдүнэн, кини оҥочону син биир уоран ылбыт уонна бэйэтэ дьаһайбыт.

Кэлин тыраахтар, УАЗ уонна мотуордаах оҥочо муниципалитекка төннөрүллүбүттэр. Ньурбатааҕы оройуон суута бу киһини буруйдааҕынан билинэн, 150 000 солк. суумаҕа ыстараабы анаабыт. Ону таһынан, кини 2 сыл болдьоххо былаас уорганнарыгар дуоһунаска үлэлиир быраабыттан маппыт. Хоромньуну толуйуу счетугар оҥочо сыаната 51 834 солкуобай төннөрүллүбүт, оттон бириигэбэр толорулларын хааччыйар инниттэн буруйданааччы массыыната былдьаммыт. Бириигэбэр сокуоннай күүһүгэр киирдэ уонна толорууга ыытылынна, диэн СӨ Сууттарын холбоһуктаах пресс-сулууспата иһитиннэрэр.