Нэһилиэк ыччата түмсүүлээх буоларга дьулуһар

Муус устар 12 күнүгэр Өлүөхүмэ улууһун Дьаарханнааҕы национальнай нэһилиэк эдэр ыччатын пуорума «Эйгэ» сынньанар киинигэр буолан ааста.

“Эдэр, эрчимнээх, элбэх интэриэһинэй идиэйэлэрдээх, олоҕу кытта тэҥҥэ хардыылыыр, сонун сүүрээни олоххо киллэриэн баҕалаах эдэр дьон түмсэн, 10 кылаас оҕолорун (кылаас салайааччыта Алексеева Л.Н.) ыҥыран пуорумҥа кытыннардылар. Ханна да буоларын курдук, тыа сиригэр эдэр ыччат ахсаана аҕыйах. Баар да буоллахтарына, ыҥырдыҥ да сүүс бырыһыан тиийэн кэлбэттэрэ баар суол. Ол эрээри Борис Басыргасов, Сарыал Халланов, Юлиана Кудряшова курдук бэйэлэрин тула ыччаты көҕүлүүр, түмэр баҕа санаалаах дьон эдэрдэри ыҥыран, остуол тула олорон сүрдээх интэриэһинэй, аһаҕас кэпсэтиини ыыттылар. Борис Басыргасов өрөспүүбүлүкэҕэ волонтерскай хамсааһын чилиэнэ, өр сылларга элбэх тэрээһиннэргэ волонтерунан үлэлээбит буолан волонтерскай хамсааһын туһунан сиһилии сырдатта, билиитин үллэһиннэ, өрөспүүбүлүкэҕэ буолан ааспыт “Муус УСТАР” бэстибээл туһунан кэпсээтэ.  Юлиана Кудряшова бибилэтиэкэр идэлээх буолан, ыччакка аралдьытар оонньуулары ыытан түргэнник уопсай тылы булларда”, — диэн кэпсээтэ “Эйгэ” сынньалаҥ киин дириэктэрэ Саргылаана Худаева.

Пуорум кыттыылаахтара «Кэриэстэбил маһа» аахсыйаҕа кытыннылар.  Эдэр дьон, үөрэнээччилэр эйэлээх олох туһугар Аҕа дойду Улуу сэриитигэр бэйэлэрин олохторун толук уурбут биир дойдулаахтарын ааттарын үйэтитэр сыаллаах аахсыйаҕа Кыһыл Сулус уордьаныгар саллаат аатын суруйан ыйаатылар. Пуорум кыттыылаахтарыгар кыттыбыттарын иһин туоһу сурук туттардылар. Кыайыы 80 сылыгар аналлаах инники үлэлэрин былаанын торумнастылар. Эдэр ыччат үлэтин өссө күүһүрдэр санаалаах пуоруму  түмүктээтэ.