Нэһилиэнньэ гааска иэһэ 189 мөл. солк. куоһарбыт

Бу сыл от ыйын 31 күнүнээҕи туругунан, Саха сиригэр нэһилиэнньэҕэ гааһынан хааччыллыыга иэһин суумата уопсайа 189 мөл. солк. тахса буолла, ол иһигэр Дьокуускайга – 138 мөл. солк. тахса. Бу туһунан «Сахатранснефтегаз» АУо пресс-сулууспата иһитиннэрэр.

Нэһилиэнньэҕэ гааһы биэрии бэрээдэгэ РФ Бырабыыталыстыбатын бигэргэппит быраабылатынан хонтуруолланар. Бу Быраабыла 45-с пуунун «в» подпуунугар олоҕуран, гааһынан хааччыйааччы туһаныллыбыт гаас өҥө иһин икки хонук устата төлөммөтөх эбэтэр ситэтэ суох төлөммүт түгэнигэр, гааһынан хааччыйыыга эбээһинэһин толорууну биир өттүнэн тохтотор бырааптаах.

Гааһы биэриинэн дуогабары толорууну тохтотуон иннинэ, иэстээх абонеҥҥа гаас бэриллэрэ тохтотулларын уонна онно төрүөтүн туһунан биллэрии, гаас тохтотуллар күнүттэн 20 халандаарынай күнтэн хойутаппакка, буостанан заказной суругунан ыытыллар.

Гаас өҥөтүн кэмигэр төлөөбөтөхтөргө маннык содуллаах буолуон сөп:

1. Төлөбүр хойутаатаҕына күн аайы пени ааҕыллар:
* 31-тэн 90 хонукка диэри – Киин Баан сүрүн ыстаапкатын 1/300 кээмэйинэн;
* 90 хонуктан элбэх буоллаҕына –Киин Баан сүрүн ыстаапкатын 1/130 кээмэйинэн;
2. Судаарыстыба пошлината, буоста ороскуота уо.д.а. иэстээх киһиттэн толуйтаран, суутунан ирдэнэр.