Нэһилиэнньэлээх пууннар киирии стелаларыгар уонна уопсастыбаннай сирдэригэр куонкурус саҕаланаары турар

Саха сириттэн Таатта биэс нэһилиэгин киирии ааннарыгар турар бэлиэлэр кыттыахтара.

Бүтүн Арассыыйатааҕы иккис «Муниципальнай тэриллиилэр киирии стелалара уонна уопсастыбаннай сирдэргэ киирэр бөлөх» куонкуруска сайаапкалары ылыы 2025 сыл атырдьах ыйын 1 күнүттэн саҕаланыаҕа диэн Ил Дархан иһинэн Архитектура уонна куораты тутуу управлениетыгар иһитиннэрдилэр.

«Күрэхтэһии өрөспүүбүлүкэ хас биирдии муниципальнай тэриллиитин уратытын көрдөрөр,  кэрэхсэтэр, табыгастаах куорат эйгэтин оҥорууга улахан суолталаах хардыынан буолар. Саха сиригэр үгүс киирии стелалар уонна уопсастыбаннай сирдэргэ киирэр бөлөхтөр өрөспүүбүлүкэ эрэгийиэннээҕи бреннэрэ буоллулар. Бүтүн Арассыыйатааҕы куонкуруска биһиги эрэгийиэммит уратытын уонна баай устуоруйатын биллэрэр өссө биир кыахтанныбыт», — диэн бэлиэтээтэ Ил Дархан иһинэн Архитектура уонна куораты тутуу управлениетын салайааччыта Любовь Папок.

Саха сириттэн  “Манчаары оонньууларын” көрсө Таатта улууһун биэс нэһилиэгэр оҥоһуллубут киирии бэлиэлэр кыттыахтара. Бу туһунан Ил Дархан, бырабыыталыстыба пресс-сулууспата иһитиннэрдэ.