Нэһилиэнньэлээх пууннарга ойуур баһаарын куттала суоһаабат

Нэһилиэнньэлээх пууннарга уонна экэниэмикэ эбийиэктэригэр ойуур баһаарын куттала суоһаабат.

Бу туһунан бүгүн, атырдьах ыйын 10  күнүгэр,  ыксаллаах быһыыны-майгыны сэрэтиигэ, туоратыыга уонна баһаартан куттал суох буолуутун хааччыйыыга суһал ыстаап хамыыһыйатын мунньаҕар Арассыыйа ЫБММ управлениетын Саха сиринээҕи салаатын начаалынньыгын э.т. Виталий Немцов иһитиннэрдэ.

—21 ойуур баһаара 28  нэһилиэнньэлээх пуунтан 15-тии км сиргэ бааллар, — диэтэ кини. Ойуур уотун умулларыыга уонна бохсууга сөптөөх үлэ ыытылларын бэлиэтээтэ.

—Эрэгийиэн сиригэр-уотугар нэһилиэнньэлээх пууннарга уонна экэниэмикэ эбийиэктэригэр куттал суоһаабат. Нэһилиэнньэлээх пууннары харыстыырга бары миэрэлэр кэмигэр ылыллаллар. Уоту умуруорууга 1700-тэн тахса киһи, 179 тиэхиньикэ үлэлиир, — диир Немцов.

Бүгүҥҥү күҥҥэ Саха сирин сиригэр-уотугар 78 ойуур баһаара, ону тэҥэ 4 ландшафтнай баһаар баара бэлиэтэнэр. Өлүөхүмэ, Дьааҥы, Горнай, Үөһээ Бүлүү улуустарыгар уустук быһыы-майгы оннунан хаалар.

СӨ Ил Дарханын уонна Бырабыыталыстыбатын пресс-сулууспата