Нейросеть худуоһунньук Иннокентий Корякин хартыыналарын «тилиннэрдэ»

Видеограф Александра Левина СӨ Култууратын туйгуна, саха худуоһунньуга Иннокентий Корякины кытта бииргэ хоту сиргэ күүтүүлээх сайын кэлбитигэр анаммыт хартыыналарын нейросеть көмөтүнэн «тилиннэрдилэр».

«Иннокентий айымньылара эйэҕэс эйгэни, остуоруйа тыынын — саха норуотун олоҕун-дьаһаҕын, номохторун уонна айылҕатын тиэрдэллэр. Мин соругум — бу тыыны видеоҕа уларыппакка хаалларыы. Бэйэм үлэбэр каадырга айылҕатынан хамсааһыны, дьиҥнээхтик көрдөрүүнү уонна ааптар санаатыгар харыстабыллаах сыһыаны ордук сыаналыыбын. Музыканан доҕуһуоллааһын —  сүрүн чааһа буолар. Бу бырайыакка мин „Кыл Саха“ этническэй музыка ансаамбылын (салайааччы Анна Томская) толоруутугар Дмитрий Санников „Дьиэрэҥкэй“ диэн композициятын таллым», — диэн Александра Левина суруйар.