Нерюнгри 32 саастаах силиэсэрэ 1,4 мөлүйүөнтэн тахса харчытын сүтэрдэ

Бу күннэргэ Нерюнгри 32 саастаах силиэсэрэ 1, 4 мөлүйүөнтэн тахса харчытын сүтэрдэ.

Бу туһунан кини ИДьМ сулууспатын Нерюнгритааҕы отделын дьуһуурунай чааһыгар биллэрдэ. 

Кини кэпсииринэн биир күн мобильнай баанын туһанан, харчы ыыппатаҕын үрдүнэн, баан счетуттан харчытын суумата көҕүрээбит. Кэлин биллибитинэн, сокуоннай сааһын ситэ илик кыыһа оонньууга киирээри, биллибэт дьон ыйыыларынан аҕатын төлөпүөнүттэн харчы ыыппыт.

Ол кэннэ кыыс оҕо социальнай ситимнэргэ өр кэмҥэ суруйсубуттарын, төлөпүөҥҥэ түөкүттэртэн киирбит звоноктар историятын барытын сотторбут. Бу туһунан ИДьМ пресс-сулууспата суруйар.