Нерюнгри аэропорда тутуллан бүтэн эрэр

2024 сыл бүтэһигэр өрөспүүбүлүкэ 14 аэропордун аныгы ирдэбилгэ түбэһиннэрэн саҥардыы түмүктэниэхтээх.

«Аэропорты Севера» казеннай тэрилтэ салайар Нерюнгри аэропорда Чульман бөһүөлэгиттэн 8 км тэйиччи сиргэ турар. Манна «Аврора», «Якутия», «Газпром-Авиа», «ИрАэро», «НордСтар» уонна «Сибирь» авиахампаанньалар көтөр ааллара кэлэн түһэллэр. Онон улахан аэропорт тутулла турар.

Чааска 100 киһини батарар эргэ аэровокзал 1987  сыллаахха тутуллубута. Оттон саҥа аэровокзал үс төгүл улаатыахтаах. Чульмаҥҥа тутулла аэропорт көтөр-түһэр балаһата икки  сыллааҕыта саҥардыллыбыта. Билигин аэровокзалы кэҥэтэ сылдьаллар.

“Соҕуруу Саха сиригэр салгынынан уонна аллараанан айан сырыытын тупсаран, дьон айанныыр усулуобуйатын тэрийии ураты болҕомтоҕо турар. Маны таһынан, тырааныспар хайысхатын сайдыыта, кэлии-барыы тиһигин быспакка олохтонуута, бырамыысаланнаска эмиэ улахан оруоллаах”, — диэн бэлиэтиир Ил Дархан Айсен Николаев.

Бүгүҥҥү күҥҥэ аэропорт үлэтин 93%-на бүттэ. Сыл бүтэһигэр эбийиэк үөрүүлээх быһыыга-майгыга аһыллыаҕа. Бу баараҕай тутууга 163 киһи уонна 17 инженернэй-техническэй салаа исписэлииһэ үлэлиир.