Путин ыйааҕынан Нерюнгри аэропуордугар Гавриил Чиряев аата иҥэрилиннэ

Владимир Путин Гавриил Чиряев аатын Нерюнгри аэропуордугар иҥэрэр туһунан ыйаахха илии баттаата.

«Нерюнгри аэропуордун» филиалыгар уһулуччулаах судаарыстыбаннай уонна бэлитиичэскэй диэйэтэл Гавриил Чиряев аата иҥэрилиннэ. Кини ССКП Саха сиринээҕи обкомун бастакы сэкирэтээринэн 1965 — 1982 сс. үлэлээбитэ. Ытык киһи аатын Нерюнгри аэропуордугар иҥэрэр туһунан ыйаахха РФ Бэрэсидьиэнэ Владимир Путин илии баттаата.

—-Ытык киһи төрөөбүтэ 100 сылыгар уонна кини хара бастакыттан улахан тирэх буолбут Нерюнгри куората тэриллибитэ 50  сылыгар сөп түбэспитэ ордук суолталаах. Саха сирин соҕуруу өттүгэр, тыйыс усулуобуйаҕа аныгы, күүстээх, сайдар киини тэрийиэххэ сөп диэн Чиряев итэҕэйбитэ, эрэммитэ. Билигин ытык киһи аата Нерюнгрины кытта үйэтитилиннэ, бу өйдүү-саныы сылдьыы, махтал уонна көлүөнэттэн көлүөнэҕэ үйэтитии бэлиэтинэн буолар, — диэтэ Ил Дархан Айсен Николаев.

Санатан эттэххэ, Саха сиригэр куоластааһын ыытыллыбыта, ол түмүгүнэн Гавриил Чиряев аата элбэх куолаһы хомуйбута.

«Нерюнгри» аэропуордун саҥа дьиэтэ 2023 с. ахсынньыга арыллыбыта.  Терминал уопсай иэнэ 9  тыһ. кв.м.

Бастакы мэндиэмэҥҥэ регистрацияланар сир, көрөр пууннар, малы-салы уурдарар сир, уо.д.а. бааллар. Иккискэ — пассажирдар күүтэр саалалара, остолобуой, оҕо уонна ийэ хоһо, уо.д.а. киирэллэр.

Аэропуорт инфраструктуратын саҥардан оҥоруу иитинэн, маны сэргэ аварийнай-быыһыыр ыстаансыйа, хонтуруоллуур-аһарар пуун, ГСМ ыскылаата тутуллубуттара. Маны сэргэ, салгын аалын түһэр-көтөр балаһата саҥардыллыбыта.

Сиһилии: https://www.sakha.gov.ru/news/6186 манна ааҕыахха сөп.

СӨ Ил Дарханын уонна Бырабыыталыстыбатын пресс-сулууспата

Андрей Сорокин хаартыскаҕа түһэриитэ, ЯСИА