Нерюнгри гимназиятын үөрэнээччитэ Росмолодежь гранын кыайыылааҕынан буолла

Атырдьах ыйын ортотуттан Хабаровскайга «Амур» ыччат Бүтүн Арассыыйатааҕы пуорума буолбута. Тэрээһин Хабаровскай кыраай губернатора Михаил Дегтярев уонна Росмолодежь салайааччыта Ксения Разуваева өйөбүллэринэн ыытылынна. Барыта 550 ыччат Арассыыйа 88 эрэгийиэниттэн кытынна.

Пуорум үлэтин түмүгэр бастыҥ бырайыактаахтар «Росмолодежь» гранын ыллылар. Нерюнгри 2-с №-дээх гимназиятын үөрэнээччитэ Дмитрий Дробот «ЭтноМедиа» бырайыагын олоххо киллэрэригэр анаан 60 тыһыынча солкуобайы тутта.

Бу бырайыак эбэҥкилэр үгэстэрин уонна култуураларын сайыннарарга туһуланар. Нерюнгри ыччата дистанционнай киэбинэн аҕыйах ахсааннаах норуот историятын, үгэстэрин, бырааһынньыктарын билэр кыахтаныаҕа.