Нерюнгри оҕолоро билиилэрин-көрүүлэрин хаҥаталлар, доруобуйаларын чэбдигирдэллэр

Нерюнгри улууһугар быйыл сайын 16 күнүскү лааҕыр үлэлиир. 

Бастакы симиэнэҕэ 882 оҕо сылдьыбыт. Итинтэн 347 оҕо уустук олохтоох дьиэ кэргэнтэн, 51 байыастар оҕолоро. Бу туһунан улуус саайтыгар суруллар. Иккис симиэнэҕэ 687 оҕо сынньанар. Итинитэн 86 оҕо уустук олохтоох дьиэ кэргэнтэн, 23 байыастар оҕолоро.

Үһүс сезоҥҥа былааннанарынан 100  оҕо сынньаныахтаах. Лааҕырдар 1 №-дээх гимназия, коррекционнай оскуола-интэринээт (үс этэрээттэн иккитэ спортивнай хайысхалаах — «Лидер» уонна «Эрэл») баазаларыгар тэриллэллэр. Үһүс симиэнэ атырдьах ыйын 1-24 күннэригэр үлэлиэхтээх.

Сайыҥҥы лааҕырдарга билиини-көрүүнү биэрэр тиэмэлэринэн уонна спортивнай тэрээһиннэр тиһиктээхтик салҕаналлар. Нэдиэлэҕэ иккитэ тэрээһиннэр А.С.Пушкин аатынан култуура уонна духуобунас киинигэр ыытыллаллар. Манна култуура управлениета тэрийсэр. Маны сэргэ, бибилэтиэкэҕэ, култуура-этнография киинигэр, киинэ тыйаатырыгар, тыйаатырга, цииркэҕэ, түмэлгэ, куорат пааркатыгар, планетарийга, баһаарынай чааска, уо.д.а. сылдьаллар.

Оттон спортивнай тэрээһиннэр сайыҥҥы успуорт былаһааккаларыгар сибиэһэй салгыҥҥа, ардахтаах күҥҥэ 18 №-дээх оскуола спортивнай саалатыгар ыытыллаллар. Өйдөтөр-сүбэлиир үлэлэри ыытарга ГИБДД бэрэстэбиитэллэрэ, «Поиск» киин, Нерюнгри киин балыыһата, уо.д.а. кытталлар.

Хас биирдии саҥа симиэнэ үөрүүлээх тэрээһининэн саҕаланар. Симиэнэни түмүктүүр тэрээһиҥҥэ оҕолорго өйдүү-саныы сылдьалларыгар сэмэй бэлэхтэр туттарыллаллар уонна минньигэс аһынан күндүлүүллэр.

Оҕолор лааҕырдарга сылдьаннар билиилэрин-көрүүлэрин хаҥаталлар, доруобуйаларын чэбдигирдинэллэр диэн Нерюнгри дьаһалтатын саайтыгар үөрэх управлениетын эбии үөрэхтээһиҥҥэ уонна иитэр үлэҕэ отдела сырдатар.