Нерюнгри олохтооҕо “салайааччытыгар” итэҕэйэн уурунуутуттан маппыт

Нерюнгри улууһун олохтооҕун телеграмыгар  куттал суох буолуутун лииньийэтигэр былааны таһынан бэрэбиэркэ ыытылларын туһунан “салайааччытыттан” иһитиннэрии кэлбит.

Ол кэнниттэн тута эр киһи төлөпүөнүнэн эрийбит уонна дьахтар счетуттан  харчыны атын дойдуга ыыппыттарын, онон счета сабыллыбытын, кини аатыттан кирэдьиит ылбыттарын туһунан иһитиннэрбит.

Соһуйбут уонна олус куттаммыт дьахтар судаарыстыбаны таҥнарыыга буруйдаабатыннар эрэ диэн,  кинилэр усулуобуйаларын барытын толорорго сөбүлэспит. Аферистар ыйыыларынан 1 375 000 суумалаах уурунуу харчытын барытын кинилэр ыйбыт  каарталарын нүөмэригэр көһөрбүт. Онтон бааҥҥа 800 000 суумалаах кирэдьиити ылан билбэт счеттарыгар ыыталаабыт.

ИДьМ Нерюнгри улууһун отделын үлэһиттэрэ сэрэхтээх буоларга ыҥыраллар.  Өскөтүн итинник хабааннаах иһитиннэриини “салайааччыттан” туттаххытына, тута  бэйэтин кытта сибээстэһиҥ.

Санатан эттэххэ, структуралар үлэһиттэрэ судаарыстыбаны таҥнарыыга уорбаланыы туһунан хаһан да төлөпүөн уонна мессенджердар нөҥүө эрийбэттэр.