Нерюнгри Олоҥхо ыһыаҕар ыалдьыттары көрсөр

Нерюнгрига  Олоҥхо ыһыаҕын тэрээһинэ бүгүн, от ыйын 2 күнүттэн, ыалдьыттары көрсүү сиэринэн-туомунан саҕаланна.

Сабаҕалааһынынан ыһыахха 15 тыһ. тахса ыалдьыт түһүлгэҕэ түмсүөхтээх. Ол иһигэр  26 улуустан тэрээһиҥҥэ кыттааччылар, икки тыһыынчаттан тахса киһи.

Сарсын, от ыйын 3 күнүгэр, 9:00 ч. Юрий Коковин «Таежная жемчужина» диэн хаартысканан быыстапката Этнокомплекса арыллар. Онтон 11:00 ч. Олоҥхо ыһыаҕын ахсын хайаан да көрдөрүллэр тимири уһаарыы саҕаланыахтаах.

А.С.Пушкин аатынан култуура уонна духуобунас киинигэр худуоһунньук Дария Дмитриева «Нерюнгри. Истоки вдохновения» персональнай быыстапкатыгар ыалдьыттары күүтэллэр.  И.И.Пьянков аатынан Нерюнгри түмэлигэр от ыйын 3-6 күннэригэр Ем.Ярославскай түмэлин «Культ коня и лошади у народа Саха» быыстапката буолуоҕа.

Куукула тыйаатырыгар 17.00 ч. А.И. Софронов «Человек» айымньытынан испэктээги көрдөрүөхтэрэ.

Этнокомплекска киэһээ түһүлгэ үөрүүлээх быһыыга-майгыга аһыллыа. Манна олоҥхоһуттар, уустар, маастардар, хотугу төрүт олохтоох норуоттар, оһуохай, фольклор былаһааккалара бааллар.

Олоҥхо ыһыаҕар барыта 70-тан тахса тэрээһин былааннанан турар. Өрөспүүбүлүкэ таһымнаах куонкурустар, спортивнай күрэхтэһиилэр, сиэр-туом толоруллуута, быыстапкалар, кэнсиэр арааһа, испэктээктэр, киинэлэр, уо.д.а. тэрээһиннэр буолуохтара.

Национальнай бырааһынньык маннык улуустарга ыытыллыбыт: Сунтаарга, Тааттаҕа, Уус Алдаҥҥа, Горнайга, Мииринэйгэ, Ньурбаҕа, Мэҥэ Хаҥаласка, Хаҥаласка, Чурапчыга, Дьааҥыга, Бүлүүгэ, Алдаҥҥа, Намҥа, Өлүөхүмэҕэ, Үөһээ Бүлүүгэ, Өймөкөөҥҥө, Аммаҕа. Ортотунан 5 — 10 тыһ. киһи сылдьыбыт.

Хас биирдии улууска социальнай суолталаах эбийиэктэр, суол-иис саҥардыллыбыта, култуура, үөрэх тэрилтэлэрин материальнай-тэхиньиичэскэй баазалара бөҕөргөтүллүбүтэ, уулуссалар, тиэргэннэр тупсарыллыбыттара.

Сиһилии: https://www.sakha.gov.ru/news/7634

СӨ Ил Дарханын уонна Бырабыыталыстыбатын пресс-сулууспата

Андрей Сорокин хаартыскаҕа түһэриитэ, ЯСИА