Нерюнгри оройуоннааҕы киин балыыһатыгар өрөмүөн барар

Нерюнгри куорат сайдыытын маастар-былаанынан бүгүн оройуон киин балыыһатын эбийиэктэрин өрөмүөннүүр үлэлэр ыытыллаллар. Бу былаан биир сүрүн соругунан буолар.

Уһук Илин 16 куоратын, ол иһигэр Дьокуускай уонна Нерюнгри социальнай- экэнэмиичэскэй кэлимник сайдыыларын былааннара РФ Бэрэсидьиэнэ Владимир Путин сорудаҕынан оҥоһуллубуттара уонна биһирэммиттэрэ.

–  Бүгүн балыыһа «А» эмтиир куорпуһун бастакы түһүмэҕэ түмүктэннэ. Балыыһа иннитэ, хоруобуйата, олоҕо бөҕөргөтүлүннэ, түннүктэр туруорулуннулар. Өрөмүөн иккис түһүмэҕэ былааннанар – дьиэ иһэ, инженернэй ситимнэрин, ааннарын уларытыы, блоктар икки ардыларыгар туоруур сири өрөмүөннээһин ыытыллыа, – диэн Нерюнгритааҕы киин балыыһа кылаабынай бырааһа Алексей Яворскай иһитиннэрдэ.

2024 сылга суһал мэдиссиинэ көмөтүн куорпуһугар, улахан дьон эмтэнэр сиригэр, акушерскай куорпуска хапытаалынай өрөмүөнү ыытыы былааннанар. Бары куорпустар мэдиссиинэ саҥа оборудованиетынан хааччыллыахтара. Ону тэҥэ быйыл дьахтар консультациятын дьиэтигэр уонна балыыһа комплексыгар (Б блок) саҥардыы үлэлэрэ ыытлыыахтара. 2026 сылга диэри Нерюнгри киин балыыһатын доруобуйа харыстабылын 14 эбийиэгр өрөмүөннүүр былааннаахтар.

Нерюнгри куорат уһун болдьохтоох кэлимник сайдыытын былааныгар коммунальнай, социальнай, тырааныспар уонна бырамыысыланнас инфраструктуратын сайыннарыыга 113,5 млрд солк. көрүлүннэ.